Б.ОД

Хан-Уул дүүргийн 11 дүгээр хорооны нутаг Ар Зайсангийн гудамжинд байрлах хийц бүтээцэд нь ан цав, цууралт үүсэж, ноцтой эвдэрч гэмтсэн барилга байгууламжуудыг глбадан буулгасан. Энэ асуудлаар Нийслэлийн Мэргэжлийн хяналтын ерөнхий Газрын (МХЕГ) дэд дарга С.Даваасүрэн мэдээлэл хийлээ. 

Тэрбээр "Энэ газрыг 2007 онд анх "Энигма" нэртэй компани авч байсан бол  одоо  Монгол үндэсний их сургууль (МҮИС)-ийн мэдэлд байна. Газрыг хүчингүй болгох хоёр заалт байдаг. Тухайлбал, зориулалтын бусаар ашигласан газрын төлбөрийг төлөөгүй бол хүчингүй болгох үндэслэлтэй.  Дархан цаазат энэ газарт сургуулийн үйл ажиллагаа явуулахыг хориглоно. Гэтэл тухайн газар эзэмшигч компани сургуулийн зориулалттай гэж хэлээд тэрбум гаруй төгрөгийн газрын төлбөрөөс чөлөөлөгдсөн байна. Тиймээс МХЕГ-аас 2017 онд шалгаад тухайн үеийн БОАЖ-ын сайдад санал хүргүүлж байсан. Тодруулбал, газрын төлбөр төлөөгүй гэдэг үндэслэлээр чөлөөлүүлэх саналыг тус яаманд өгсөн байдаг.Газрын тухай хуулийн дагуу сургууль соёлын байгууллагыг газрын төлбөрөөс чөлөөлнө гэдгийг барьж төлбөр төлөөгүй. Гэтэл тусгай хамгаалалттай газарт байгаа. Тусгай хамгаалалттай газар сургуулийн үйлчилгээ явуулахгүй гэж заасан байдаг. Газрын албанаас жилийн өмнө тус компанид үйл ажиллагаа явуулж болохгүй байшин барилгаа буулга гэж мэдэгдсэн. Мэдэгдлийн дагуу шийдээгүй учраас нийслэлийн Засаг даргын захирамжаар албадан буулгасан" гэв.