Б.НЯМСҮРЭН

Цагдаагийн байгууллагаас зургаадугаар сарын 10-ны баасан гарагийн 22:00 цагаас 11-ний 06.00 цаг хүртэлх хугацаанд шөнийн хяналт шалгалтыг улсын хэмжээнд зохион байгуулсан байна. Хяналт шалгалтын хугацаанд архи согтууруулах ундааны зүйл хэрэглэсэн үедээ тээврийн хэрэгсэл жолоодсон зөрчил Нийслэлд 366, Орон нутагт 289 нийтдээ 655 жолоочийг илрүүлж учирч болох эрсдэлээс урьдчилан сэргийлжээ. Тус арга хэмжээнд Цагдаагийн ерөнхий газрын харьяа алба, нэгж, нутаг дэвсгэр хариуцсан цагдаагийн байгууллагын 2000 гаруй алба хаагчид 800 гаруй хяналтын цэгт шалгалт явуулсан байна.

Мөн тээврийн хэрэгсэл жолоодох эрхгүй хөдөлгөөнд оролцож явсан зөрчил нийслэлд 63, орон нутагт 176 нийт 239 зөрчил, цагдаагийн байгууллагын эрэн сурвалжлах /АСАП/ санд бүртгэлтэй эрэн сурвалжлагдаж байгаа зургаан иргэн, эд зүйлс 9, тээврийн хэрэгсэл 3 тус тус илрүүлсэн аж. 

Зам тээврийн ослын улмаас эхний таван сарын хугацаанд улсын хэмжээнд 195 хүн нас барсны 43 буюу 22 хувь нь согтуу жолоочийн буруутай үйлдлээс болж амь насаа алджээ. Хөдөлгөөнд оролцогч та дээрх нөхцөл байдалд дүгнэлт хийж, өөрийн болон бусдын амь нас эрүүл мэнд, эд хөрөнгөд хохирол учруулж болзошгүй эрсдэлээс өөрийгөө хамгаалахыг ТЦА-наас анхаарууллаа.

Эх сурвалж: www.polit.mn