Б.ОД

Монгол Улсын Ерөнхийлөгчийн ивээл дор “Бизнес ба эмэгтэйчүүд” зөвлөлдөх уулзалт өнөөдөр Монголын үндэсний худалдаа, аж үйлдвэрийн танхимын Их танхимд боллоо.

Зөвлөлдөх уулзалтын нээлтэд Монгол Улсын Ерөнхийлөгчийн Тамгын газрын дарга Я.Содбаатар оролцож, үг хэлэв.

Тэрбээр Ерөнхийлөгч У.Хүрэлсүх “Халамжаас хөдөлмөрт” суурь шинэчлэлийн хүрээнд эмэгтэйчүүдийн ажил эрхлэлт, бизнесийг дэмжих, өрхийн орлогыг нэмэгдүүлэхэд анхаарал хандуулан ажиллаж байгааг тэмдэглэлээ.

ҮСХ-ны 2021 оны ААН тооллогын урьдчилсан дүнгээр нийт ААН-ийн 38 хувь нь эмэгтэй захиралтай байна.  Харин жижиг, дунд үйлдвэрлэлийн салбарт үйл ажиллагаа эрхэлж байгаа бизнес эрхлэгчдийн 60 гаруй хувийг эмэгтэйчүүд эзэлж байна.

Гэвч эмэгтэйчүүдийн ажиллах хүчний оролцооны түвшин сүүлийн жилүүдэд буурах хандлагатай байгаа бөгөөд энэ оны эхний улирлын байдлаар 50 хувьтай байхад эрэгтэйчүүдийнх 66.5 хувьтай байгаа юм.

Эмэгтэйчүүдийн ажиллах хүчний оролцоог нэмэгдүүлэх, эмэгтэй бизнес эрхлэгчдийг дэмжихэд тулгамдаж буй асуудлуудыг зөвлөлдөх уулзалтаар хамтдаа тодорхойлж, шаардлагатай бодлогын болон эрх зүйн орчныг бүрдүүлэх чиглэлээр идэвхтэй хэлэлцүүлэг өрнүүлнэ гэдэгт итгэж байгаагаа илэрхийллээ.

Уулзалтаас гарсан санал, зөвлөмжийг нэгтгэн ирэх намар Монгол Улсын Ерөнхийлөгчийн ивээл дор зохион байгуулах үндэсний чуулганаар хэлэлцүүлэх юм.

Ерөнхийлөгчийн Тамгын газар, Хөдөлмөр, нийгмийн хамгааллын яам, Монголын үндэсний худалдаа, аж үйлдвэрийн танхимаас хамтран зохион байгуулсан зөвлөлдөх уулзалтад эмэгтэй бизнес эрхлэгчид, төрийн болон төрийн бус байгууллагууд, мэргэжлийн холбоод, олон улсын байгууллагуудын төлөөллөөс бүрдсэн 100 гаруй хүн оролцлоо.

Эх сурвалж:www.polit.mn