Б.ОД

УИХ-ын Байгаль орчин, хүнс, хөдөө аж ахуйн байнгын хорооноос Усны тухай хуульд нэмэлт оруулах тухай хуулийн төсөл болон хамт өргөн мэдүүлсэн бусад хуулийн төслийн талаарх хэлэлцүүлгийг өнөөдөр Төрийн ордонд зохион байгууллаа.  

Усны тухай хуулийг анх 2004 онд баталж, 2012 онд шинэчлэн найруулсан юм. Ингэхдээ зургаан удаа хууль эрх зүйн зохицуулалт хийжээ.

Энэ талаар УИХ-ын гишүүн, ажлын хэсгийн ахлагч Г.Мөнхцэцэг "Усны тухай хуульд газар доорх ус, түүний хамгаалалт, ашиглалт болон бусад зохицуулалтын талаарх эрх зүйн орчин бүрдээгүй. Энэ нь экологийн тэнцвэргүй байдлыг бий болгох, улмаар усны хомстол үүсгэж болзошгүй тооцоо, судалгаа байгаа нь анхаарал татсан асуудал. Иймд Усны тухай хуульд нэмэлт оруулж, ирэх намрын чуулганы хугацаанд хэлэлцүүлэхээр ажиллаж байна. Газрын доорх усыг ашиглаж буй иргэн, аж ахуйн нэгж, байгууллага хоорондын харилцааг зохицуулах, хяналт, хариуцлагын тогтолцоог сайжруулах нь өнөөгийн тулгамдсан асуудал юм" гэв.

Хуулийн төслийн талаарх танилцуулгыг Усны газрын дарга Ш.Мягмар хийлээ. Газрын доорх цэнгэг усны ордыг уул уурхай болон үйлдвэрийн зориулалтаар ашиглахыг хориглох, гадаргын болон газрын доорх уснаас ашиглах боломжт нөөцийн дээд хязгаарыг ус ашиглах эрхийн эрэмбийг тогтоох гэсэн заалтыг хуульд тусгажээ.

Эх сурвалж:www.polit.mn