Ч.ЗОТОЛ

Хөдөлмөрийн Үндэсний намаас төв талбайд зохион байгуулсан “Өөрсдөө өөрчил, чадахгүй бол тар” тайван жагсаалд оролцогчид УИХ-д шаардлага хүргүүллээ. Үндсэн хуулийг үндсээр өөрчил, өөр нийгмийг байгуул гэсэн шаардлагын хариуг тав хоногийн дотор өгөхийг шаарджээ. Энэ үеэр тус намын дарга, УИХ-ын гишүүн Т.Доржханд  үг хэлэв. Тэрбээр “Берлиний ханыг нураахад долоо хоног бүр иргэд гарч  жагсдаг байсан. Эхний удаа мянга, хоёр мянга, дараагийнхад 10-20 мянга, тэгээд 100 мянган хүн гарч жагсдаг байсан юм. Тэгж байж тэр ханыг  нураасан түүхтэй. Үр дүнд нь Германы иргэд эрх чөлөөгөө олж авсан байдаг. Түүнтэй адил өнөөдөр  бид хэдэн мянгуулаа цугласан байж магадгүй. Гэхдээ тогтмол зохион байгуулаад явбал хэдэн зуун хүн цуглаж жагсах боломжтойг эрх баригчдад хэлмээр байна. Бид чадна. Ийм байдалд оруулахгүйн тулд, үр хүүхэд, ирээдүйнхээ төлөө энэ улс орныг өөрчлөх хэрэгтэй. Өөрчлөхийн тулд төсөв  болохгүй байна, тойргийн төсөв биш шүү гэж  гуйсан. Иргэдэд талх чихэр, боов боорцог тараах бус бодлого баталдаг, урт хугацааны төлөвөлгөө гаргаж хэрэгжүүлдэг шинэ Монголыг бий болгоход туслаач гэж хэлсэн. Ердөө энэ. Тав хоногийн  хугацаанд шаардлагыг биелүүлэхгүй бол тэмцэх болно. Үр хүүхдийнхээ төлөө тэмцэнэ. Хүүхдүүдээ өөр газар аваачиж сургамааргүй байна шүү дээ. Өөр хэлээр ярьж өсч том болдог  баймааргүй байна. Өөрийн улсын түүхээ үр хүүхдүүддээ зааж өгмөөр байна. Эрх чөлөөтэй улсын иргэн байх мэдрэмжийг өгмөөр байна. Ижил тэгш эрхтэй ийм нийгмийг байгуулж өгмөөр байна. Монголдоо сайхан амьдаръя. Залуустаа боломж өгье. Өөр 30 жилийг өнөөдөр бий болгоё. Үүнийг УИХ-ын эрхэм гишүүдээсээ гуйж байна” гэлээ.

Эх сурвалж: www.polit.mn