Ч.ЗОТОЛ

Хөдөлмөрийн үндэсний намаас  төв талбайд зохион байгуулсан “Өөрчил, чадахгүй бол тар” тайван жагсаал УИХ-ын даргыг гарч ирнэ үү  гэсэн  шаардлагаар үргэлжилж байна.  Жагсагчид “Үндсэн хуулийг өөрчил”, “Тогтолцоог өөрчлөхгүйгээр улс орон хөгжихгүй, бидний амьдрал сайжрахгүй”, “Залуусын санал гээгдэж байна”, “Жалганы гишүүд залуусыг бодохгүй”, “МАН гарч ирж байдаг мажоритар тогтолцоог хал” гэсэн уриа, лоозон барьжээ.  Монголын залуучуудын холбоо, түүний салбар зөвлөл, МУИС, ШУТИС-ийн оюутны холбоо, залуучууд түлхүү оролцож байна.  Олонх нь 2019 онд Үндсэн хуульд  оруулсан  нэмэлт, өөрчлөлт дутуудсан. Үндсэн хуулиа үндсээр нь өөрчлөх хэрэгтэй хэмээн байр сууриа илэрхийлж байгаа юм.

ХҮН-ын  дэд дарга Б.Найдалаа  энэ үеэр “Нүдэнд юм орвол усаар угаадаг. Тэгвэл 76-хан хүн төрд бугшиж, ужгирч , дархлагдаж, хулгайч болоод суугаад байгааг яаж цэвэрлэх вэ. Үүнийг цэвэрлэхийн тулд саармагжуулах хэрэгтэй. Яаж саармагжуулах вэ, тэдний тулж байгаа таягийг хугалах хэрэгтэй. Сонгуулийн тогтолцоог нь өөрчлөх хэрэгтэй . Энэ бол цорын ганц зөв шийдэл. Үүний араас бүх гарц, зөв шийдэл бий болно. Тиймээс УИХ-ын дарга гарч ирж шаардлагыг хүлээж авах хэрэгтэй. Шийдлийг хүлээж ав, өөрчил. УИХ –аа хуралдуул. Бусад жижиг, сажиг төслүүдээ хойшлуулж байгаа Үндсэн хуулиа өөрчил, үндсээр нь өөрчил” гэлээ.

Эх сурвалж: www.polit.mn