Венецэд дэлгэсэн “Гүнээс гүнд”

Нүүр

Геополитик

Венецэд дэлгэсэн “Гүнээс гүнд”

2022-04-27

Нийтэлсэн: Админ

2 мин унших

ХУВААЛЦАХ

ЖИРГЭХ

Ч.ГАНТУЛГА

Дэлхийн дүрслэх урлагийн чиг хандлагыг тодорхойлдог Венецийн дүрслэх урлагийн олон улсын 59 дэх удаагийн наадам Итали хотод амжилттай үргэлжилж байна. Хоёр жил тутамд зохион байгуулдаг энэ арга хэмжээнд Монгол Улсын “Гүнээс гүнд” павилон албан ёсоор нээлтээ хийсэн билээ. Үзэсгэлэнд оролцож буй зарим онцгой бүтээлийн тухай мэдээлэл хүргэе.

Нууцлаг ертөнцийн тайлал

Энэ удаагийн наадамд манай улс уран бүтээлч Ж.Мөнхцэцэгийн зөөлөн баримал, зүймэл, видео гэсэн бүтээлийг дэлгэсэн байна. Эдгээр уран бүтээл нь түүний сүүлийн 15 жилийн хөдөлмөр ажээ. Ж.Мөнхцэцэгийн хувьд бүсгүй хүний дотоод нууцлаг ертөнцийг өгүүлсэн уран бүтээлээр дагнадаг онцлогтой. Манай улсын хувьд Венецийн олон улсын биеннальд 2015 онд “Оторын гэр”, 2017 онд “Хөх тэнгэрийн дор төөрөгсөд”, 2019 онд “Агшин зуур” нэртэй үзэсгэлэнгээр оролцож байсан туршлагатай билээ. 1895 оноос зохион байгуулах болсон Венецийн дүрслэх урлагийн олон улсын биеннальд дэлхийн нөлөө бүхий уран бүтээлчид бүтээлээ дэлгэж, өөрийн орны дүрслэх урлагийн чансаа, сэтгэлгээний цар хүрээ, үзэл бодлоо илэрхийлдэг юм.

Хорвоогийн жамын тухай өгүүлэх гол бүтээлүүд

Энэ удаагийн үзэсгэлэнд оролцож буй Ж.Мөнхцэцэгийн бүтээлүүдийг куратор Б.Гантуяа ийнхүү тайлбарлажээ.

1. Үзэсгэлэнгийн эхний танхим болох “Зээрийн зүүд” нэртэй сарнайг санагдуулам орон зайд мультимедиа өрөг ажлыг байршуулсан ба төмөр орон дээр зээр хэвтэж буй тал биетэй зээрийн баримал, төөрсөн зээрийн янзаганы дүрс бичлэгтэй сүлэлдэн нэгэн цогц бие болон хувирахыг харуулна.

2. Ж.Мөнхцэцэгийн хорвоогийн бүхий л эд эс, амьд бүхэн нийлээд нэг сансар буюу бүхэл ертөнцийг бүтээсэн гэх утга бүхий “самсара”-аас улбаатай санаа нь сансрын бие хэмээн нэрлэсэн “Судасны чимээ” нэртэй удаах танхимд тусгалаа олсон буй. Иймээс нэгэн цул гэдгийг илэрхийлэхийн тулд амьтны биеийг хүний биетэй нийлүүлсэн хайбрид баримлуудаа “сансрын биес бус” “сансрын бие” гэжээ. Танхим дахь баримлууд оршин тогтнохын төлөөх хувьсгалын санааг агуулах ба зарим амьтныг хүн шиг гар хөлтэй, заримыг нь эрхтэн дутуу дүрсэлсэн аж.

3. Сүүлчийн “Дутуу төрөлт” хэмээх давчуухан өрөөнд үр зулбахаас хамгаалан тэтгэх дом, зан үйлийг бэлгэдсэн “умайг хамгаалагч шувуу” нэртэй бүтээлийг байршуулсан юм. Ж.Мөнхцэцэгийн үзэсгэлэн бүхэлдээ хорвоо ертөнцийн жам ёс, нигүүлсэн сэтгэл, илааршлын тухай өгүүлнэ.