С.САРУУЛ

Нярай хүүхдийг гудамжинд орхисон зураг мэдээллийг нэгэн иргэн цахимд тавьсан байв.  Үүнтэй холбоотойгоор ГБХЗХГ-ын хүүхдийн хөгжил, хамгааллын хэлтсийн дарга Н.Хөхөө “Нярай хүүхэд орхисон асуудлыг тус дүүргийн Цагдаагийн хэлтсээс шалгалтын ажиллагаа явуулж байгаа. Дөрвөн сартай хүүхдийг авч, эрүүл мэндийн үзлэг шинжилгээнд хамруулж, түр хамгаалах байранд аваачиж хамгаалалтад авсан. Харин хүүхдийн эцэг, эхийг архи согтууруулах ундааны зүйл хэрэглэсэн байсан учир эрүүлжүүлсэн. Өнөөдөр саатуулах байрнаас гаргаж зөрчил шалган шийтгэх ажиллагааг явуулж байна хэмээн Цагдаагийн байгууллагаас мэдээлэл өгсөн.

Тухайн газар дээр очиход хүүхдийг аваад явсан байсан. Тиймээс гэрийн хаягийг тогтоож, очиж уулзаж, хүүхдийг хамгаалах байранд хүлээлгэж өгсөн. Хүүхэд хөхүүл байсан учраас Налайх дүүргийн эрүүл мэндийн төвд анхан шатны тусламж үзүүлсэн. Тухайн хүүхдийн асран хамгаалагчид хүүхдээ авч явах чадамжгүй байсан. Тиймээс эсрдэлийн үнэлгээ, хүүхдийн хүчирхийллийн үнэлгээг газар дээр нь хийсэн байгаа. Цагдаагийн байгууллага хэргийг шалгаж, мэдүүлэг авах процесс  явж байна. Эрсдэлийн үнэлгээ өндөр гэж гарсан учраас хүүхдийг түр хамгаалах байранд байлгаж байгаа. Эцэг, эхээс нь байцаалт авсаны дараа шийдвэрийг гаргана.

Хүүхэд хамгааллын журмаар Гэр бүлийн хүчирхийлэлтэй тэмцэх тухай хуулийн дагуу тухайн гэр бүлийн нөхцөл байдлыг хорооны хамтарсан баг үнэлгээ хийж, одоо хуралдаж байна. Хорооны хамтарсан баг шийдвэр гаргаж, холбогдох үйлчилгээг үзүүлнэ. Мөн эцэг эхэд хуулийн дагуу хариуцлага тооцож, 300 нэгжээр торгох заалттай. Хөхүүл хүүхэд учраас ээжээс нь аль болох салгахгүй байх бодлого барина. Эрсдэл өндөр гэж үзвэл хүүхдийг эцэг, эхэд нь өгөхгүй байх зохицуулалт хийнэ. Хэрэв эцэг, эх байх эрхээс түдгэлзүүлэх тохиолдолд цагдаагийн байгууллагаас шүүхэд хүсэлт өгнө” гэв.

Эх сурвалж: www.polit.mn