Б.ДОЛЖИН

Монгол Улсын Ерөнхийлөгч У.Хүрэлсүх өнөөдөр УИХ-ын дарга, Ерөнхий сайд, УИХ-ын байнгын хороодын дарга нар, Засгийн газрын гишүүд, УИХ дахь МАН-ын бүлгийн дарга, гишүүдэд үүрэг, чиглэл өгчээ.

Тэрбээр "УИХ-ын дарга, Ерөнхий сайдтай ҮАБЗ-ийн хүрээнд уулзаж, жагсаалын нөхцөл байдал болон иргэдийн тавьсан шаардлагын талаар ярилцсан. Энэ уулзалтын дараа Ардчилсан Намын бүлгийнхэнтэй уулзана. Бид нар ниргэсэн хойно нь хашхирав байдалтай байна гэж би хараад байгаа. Хүнсний аюулгүй байдал, зам тээвэр, шатахууны асуудлуудад анхаарч ажиллах шаардлагатайг анхааруулсан. Гэвч сануулж хэлээд байхад өнөөдрийн нөхцөл байдалд тулж байна. Цар тахалтай хоёр жил тэмцлээ. Дараа нь Орос, Украины асуудал үүссэн. Сүүлийн нэг жилийн хугацаанд дэлхийн зах зээл дээр газрын түүхий тосны үнэ хоёр дахин, үр тариа, мах, ургамлын тосны үнэ 30-40 хувиар нэмэгдсэн. УИХ, Засгийн газар харилцан уялдаа холбоотой байж үнийн асуудал болон эрчим хүчний асуудалд онцгойлон анхаармаар байна. Хүнсээ гадаадаас авахгүй, дотоодоосоо хангая. Өөрсдийн гэсэн эрчим хүчний эх үүсвэр, нефть шатахуунтай байх нь чухал гэдгийг цар тахлын өнгөрсөн хоёр жил харууллаа. Монгол Улс цаашдаа тусгаар тогтносон, эдийн засгийн хараат бус, бие дааж амьдарч чадах улс орон болох шаардлага зүй ёсоор тавигдаж байна. Сэтгэл, зориг гаргаж ажилла. Шаардлагатай гэвэл төсөвт тодотгол хийж болно. Тодорхой асуудлуудыг шийдэх хэрэгтэй. Хэрэгцээгүй бүх зардлыг тана. Байнгын хороодын дарга болон Засгийн газрын гишүүд шуурхай ажилла" гэв.