Б.ДОЛЖИНЖАВ

Украины Буча хотод энгийн иргэдийг буудан амийг нь хороосон гэсэн мэдээлэл цацагдсантай холбоотойгоор Европын холбоо Оросоос нүүрс импортлохоо зогсоохоор төлөвлөж байгаагаа удирдлагууд нь мэдээлжээ.

Тодруулбал, ОХУ-ын Ерөнхийлөгч Владимир Путины Украины эсрэг явуулж байгаа цэргийн үйл ажиллагааны хүчийг бууруулах тав дахь багц хориг арга хэмжээнийхээ хүрээнд жилийн дөрвөн тэрбум еврогийн өртөг бүхий нүүрсний импортоо үе шаттайгаар зогсоохыг Европын комисс санал болгосон байна. Гэхдээ Европын холбооны гишүүн 27 орон энэ хориг арга хэмжээг хүлээн зөвшөөрөх ёстой юм.

Олон улсын эрчим хүчний агентлагын мэдээлснээр Австрали, Индонезийн дараа нүүрсний экспортоороо Орос гуравдугаарт жагсаж байна. Тус улсын нүүрсний хамгийн том хэрэглэгч нь Европын орнууд юм. Тодруулбал, тус тив 2020 онд Хятадаас 31 сая тонныг экспортолсон бол Оросоос 57 сая тонн чулуужсан  нүүрсийг экспортолсон байна. Энэ нь Европын жилийн нүүрсний хэрэглээний талаас илүү хувийг бүрдүүлж байгаа юм.

Эрчим хүчний гол эх үүсвэрээ нүүрснээс хангадаг Герман, Польш тэргүүтэй орнуудад Оросоос авах нүүрсэндээ хориг тавих нь тэдний толгойны өвчин болно хэмээн ажиглагчид үзэж байна.  Энэ талаар Европын холбооны эрчим хүч, нүүрстөрөгчийн асуудал хариуцсан ахлах шинжээч  Мэттью Жонс “Нүүрсний хориг нь улам дордож байгаа Европын нийлүүлэлтийг хүндрүүлж, нүүрсний өөр эх үүсвэр хайхад хүргэнэ” гэж “CNN Business” сувагт ярьжээ.