Б.ДОЛЖИНЖАВ

Сүүлийн жилүүдэд зарим уяач гадаадаас импортоор цэвэр цусны азарга оруулж ирэн Монгол азаргыг амьдаар нь эд эрхтэнийг тасдан, тамалж байгаа талаар Монголын үндэсний морин уралдаан, уяачдын холбоо болоод “Монгол адуу нийгэмлэг”-ээс өнөөдөр Үндэсний мэдээллийн төвд мэдээлэл хийлээ.

Тэд гадаадаас импортоор үржүүлгийн зориулалтаар цэвэр цусны азарга оруулж ирэхийг хориглох, Монгол адууны эд, эрхтэнг нь амьдад нь тасдах харгис үйлдлийг  улсын хэмжээнд хатуу хориглох шийдвэр гаргах талаар Ерөнхийлөгч У.Хүрэлсүх, ХХААХҮ-ийн сайд З.Мэндсайхан нарт шаардлага хүргүүлж байгаа юм.

 Энэ талаар “Монгол адуу нийгэмлэг”-ийн удирдах зөвлөлийн гишүүн Г.Чойжамц “Ярихаас аманд үг эвлэж өгөхгүй таагүй зүйлийн тухай бид ярих гэж байна. Төрийн сүлдэндээ залаад хийморь, сүлдийг нь өөрсдийн хийморьтой холбож ярьдаг Монгол эрчүүд өнөөдөр тэр адуугаа амьдаар нь унтуулж байгаад үржлийн эрхтэнг нь тайрч байна. Импортын цэвэр цусны азарга нь  Монгол азарга шиг сүргээ хурааж, бэлчээрээр идээшилж чаддаггүй. Мөн гүүнийхээ ороог тодорхойлох байгалийн төрөлх зан байхгүй. Тиймээс импортын азаргандаа гишгүүлж хээлтүүлэг хийсэн гүүнийхээ хээлийг хамгаалах, үр төлийг нь зарах зорилгоор Монгол азарганы үржлийн эрхтэн болох сэлдийг нь тасдан туршуул нэртэй азаргыг бий болгон Монгол адууг амьдаар зэрэмдэглэж амьтны жам ёсны эрхийг зөрчиж байна. Мөнгөний төлөө гадаадаас оруулж ирсэн цэвэр цусны азарга бүрийн тоогоор Монгол азарганы үржлийн эрхтэнг тасдан зэрэмдэглэсээр байна. Цахим хуудаснаа “Туршуул азарга зарна” гэж хайхаар олон пост гарч ирнэ. Эдгээр постонд “Туршуул азаргыг нэг өдрийн 600-800 мянган. төгрөгөөр хийнэ” гэсэн сэтгэгдэл олон бий. Энэ бол бидний өнөөдрийн ярьж байгаа бүхний баталгаа юм. Хүмүүс эрлийз адууг гадаадаас оруулж ирээд Монгол гүүтэй нийлүүлээд хээл авдаг гэж бодож байсан. Гэтэл бодит байдал тийм биш. Тиймээс Монгол адууг зэрэмдэглэж байгаа эдгээр хүмүүстэй хатуу хариуцлага тооцох хэрэгтэй. Гадаадаас импортоор үржүүлгийн зориулалтаар цэвэр цусны азаргыг Монголд оруулж ирэхийг хориглохыг, Монгол адууг зэрэмдэглэхийг таслан зогсоож, хатуу хариуцлага тооцохыг Ерөнхийлөгч У.Хүрэлсүхээс шаардаж байна” гэв.

 Эх сурвалж:www.polit.mn