"Сумын хөгжил, инженерийн дэд бүтцийн хангамж" хэлэлцүүлэг өнөөдөр болж байна. Хэлэлцүүлэгт Барилга, хот байгуулалтын яам, Эдийн засаг, хөгжлийн яам, Эрчим хүчний яамнаас гадна 19 аймаг, 93 сумын төлөөлөл оролцож байна.

Энэ үеэр Барилга, хот байгуулалтын яамны Нийтийн аж ахуй, инженерийн дэд бүтцийн бодлогын хэрэгжилтийг зохицуулах газрын дарга Г.Цогтсайхан "Засгийн газрын 161 дүгээр тогтоолоор Сумын хөгжил, инженерийн дэд бүтцийн хангамж төсөл батлагдсан.  Сумдад амьдарч байгаа нэг сая 80 мянга орчим иргэнд зориулсан төсөл юм. Түүнчлэн төвлөрлийг бууруулах, сумандаа ая тухтай амьдрах зорилготой. Дундговь аймгийн Гурвансайхан, Баянхонгор аймгийн Өлзийт, Төв аймгийн Бүрэн сум жишиг сум болж байгаа. 2022 оны улсын төсөвт 14 сумын инженерийн дэд бүтцийг шийдэхэд 84 тэрбум төгрөгийн төсөв батлагдсан. Үүний дагуу ажил эхлээд явж байна. Бүх сумын асуудлыг нэг төсвөөр бүрэн шийдэж чадахгүй. Үндсэн эх үүсвэр болох цэвэрлэх байгууламж, халаалтын зуухыг барьж, нийгмийн дэд бүтцийн барилга байгууламж, айл өрхийн тодорхой хувийг холбох төлөвлөгөөтэй ажиллаж байна. Ингээд жишээ авч орон нутгийн төсвөөсөө өөрсдөө цааш нь бага багаар ажлаа үргэлжлүүлэх боломжтой. Эрчим хүчний яамнаас төр, хувийн хэвшлийн түншлэлийн хүрээнд халаалтын зуухыг нь хувийн байгууллагаар хийлгэж байгаа. Дэд бүтцийн ажил тасарч байгаа нь хөрөнгө оруулалттай холбоотой" гэв.