УИХ-ын Үйлдвэржилтийн бодлогын байнгын хорооны өнөөдрийн (2022.03.28) хуралдаанаар Монгол Улсыг 2021-2025 онд хөгжүүлэх таван жилийн үндсэн чиглэлийн тухайн жилийн гүйцэтгэлийн явц болон Монгол Улсын Засгийн газрын 2020-2024 оны үйл ажиллагааны хөтөлбөрийн 2021 оны хэрэгжилтийг хэлэлцэв. Байнгын хорооны хуралдаанд энэ талаар Улсын Их Хурлын гишүүн, Засгийн газрын гишүүн, Сангийн сайд Б.Жавхлан танилцууллаа. Засгийн газрын үйл ажиллагааны хөтөлбөрийн хэрэгжилт 2021 оны байдлаар 74.5 хувийн хэрэгжилттэй байна гэж дүгнэжээ.

Хөтөлбөрийн хэрэгжилтийг бодлого тус бүрээр дурдвал, COVID-19 халдварт цар тахлаас үүдэлтэй нийгэм, эдийн засгийн хүндрэлийг даван туулах бодлого-88 хувь, Хүний хөгжлийн бодлого-78 хувь, эдийн засгийн бодлого-71 хувийн хэрэгжилттэй байгааг Б.Жавхлан сайд танилцуулав.

Монгол Улсыг 2021-2025 онд хөгжүүлэх таван жилийн үндсэн чиглэл, Засгийн газрын үйл ажиллагааны хөтөлбөрийн хүрээнд үр дүнтэй хэрэгжиж байгаа томоохон зорилт, арга хэмжээнээс Сангийн сайд дурдсан. “Эрүүл мэндээ хамгаалж, эдийн засгаа сэргээх 10 их наядын цогц төлөвлөгөө"-ний хүрээнд ажлын байрыг дэмжих зээлд 1.9 их наяд төгрөг, репо санхүүжилтийн зээлийн хүрээнд нийт 789.8 тэрбум төгрөг, ипотекийн хөнгөлөлттэй зээлийн хүрээнд 925 тэрбум төгрөг, хөдөө аж ахуйг дэмжих болон малчдыг дэмжих зээлийн хүрээнд 384.2 тэрбум төгрөг тус тус олгоод байгаа аж.

Төсвийн хөрөнгө оруулалттай бүтээн байгуулалт өнгөрсөн хугацааны бараа бүтээгдэхүүний үнийн өсөлттэй холбоотойгоор нэлээд төвөгтэй нөхцөлд үргэлжилсэн. Аж ахуйн нэгжүүдтэй байгуулсан үнийн итгэлцүүрүүдээ шинэчлэх шаардлагатай ч энэ ажил удааширч, улмаар аж ахуйн нэгжүүдийн санхүүжилт хүндэрч байгааг Ж.Батжаргал гишүүн хөндөв.