Монголын авто замчдын холбоо, Зам, тээврийн хөгжлийн яамтай хамтран 2013 онд "Road Expo Mongolia" олон улсын үзэсгэлэнг анх удаа зохион байгуулж байв. АНУ, Япон, БНСУ, Герман, ОХУ, Итали, БНХАУ-аас экспертүүд ирж илтгэл тавьсан нь үр дүнтэй болж тус арга хэмжээг жил бүр уламжлал болгон зохион байгуулахаар болсон юм.

Ийн “Road Expo Mongolia" найм дахь удаагийн олон улсын үзэсгэлэн өнөөдөр эхэлсэн бөгөөд маргааш дуусна. Үзэсгэлэнд авто зам, гүүрийн инженер техникийн ажилтнууд, зам, хот төлөвлөлтийн архитектурууд, зам, гүүрийн барилга, зураг төслийн компаниуд, замын тэмдэг, тэмдэглэгээ, гэрэл дохио үйлдвэрлэгчид, их дээд сургуулиуд, политехникийн коллежууд гэсэн олон аж ахуйн нэгж оролцож, гурван орны эрдэмтэн, судлаачид шинэ дэвшилтэт техник технологи, судалгааны ажлаа танилцуулж байна. Энэ үеэр замын техник, технологи, материалын үзэсгэлэн, бага хурал болох юм.

Үзэсгэлэнг нээж ЗТХЯ-ны Төрийн нарийн бичгийн дарга С.Батболд  "Цар тахлаас үүдэн сүүлийн хоёр жил энэ арга хэмжээг зохион байгуулж чадаагүй ч авто замчдын ажил зогсоогүй. Техникийн ажилчид мэдлэг туршлагаа хуваалцдаг, дэвшилтэт техник технологитой танилцаж, нэвтрүүлдэг, хамтын ажиллагааг өргөжүүлдэг уламжлалт арга хэмжээ болж байна. Авто замчид бол хийж буй ажил нь хүний нүдэн дээр ил байдаг бүтээн байгуулагчид юм.  ОХУ, БНХАУ, АНУ, ХБНГУ, Япон, БНСУ зэрэг долоон орны 70 орчим аж ахуйн нэгж үзэсгэлэн, бага хуралд оролцож байгаа. Монгол Улсын авто замын сүлжээ жил бүр өргөжин тэлж, 21 аймаг, 106 сум, таван боомтыг хатуу хучилттай авто замаар холбоод байна" гэсэн юм.