Энэ үеэр Хууль зүй, дотоод хэргийн яамны Төрийн нарийн бичгийн дарга П.Сайнзориг “Гэмт хэргийн улмаас амь насаа алдсан хохирогчийн ар гэрийнхэнд оршуулгын зардлаас өөр зүйл олдохгүй байгаа. Энэ нь хууль эрх зүйн тодорхойгүй орчинтой ч холбоотой. Гэхдээ ийм асуудал дээр шүүх тодорхой практик жишиг тогтоож байгаа жишээнүүд бий. Хамгийн сүүлд Зам тээвэр, хөгжлийн яаманд хүний амь нас хохирсон хэрэгт зөвхөн сэтгэл санааны хохирлоос гадна тэжээн тэтгэх үүрэгтэй холбоотой асуудалд 500 сая төгрөг гаргуулахаар болсон шүүхийн шийдвэр байна. Энэ мэт асуудлыг тодорхой болгох үүднээс энэ хуулийн төслийг оруулж ирсэн. Бодит хохирлыг шүүх тогтооно. Хүний амь насны доод хэмжээг хөдөлмөрийн хөлсний хэмжээг 150 дахин нэмэгдүүлсэн буюу 63 сая төгрөгөөр үнэлж хуульд тусгасан. Мөн өөр нэгэн аргачлалын хувилбар байгаа нь хүн амын дундаж наслалтаас тухайн гэмт хэргийн улмаас нас барсан иргэний насыг хасна. Жишээ нь, хүн амын дундаж наслалт 70, 20 настай хүн амиа алдлаа гэхэд 50 насны зөрүү гарч байна. Тэр хүн 50 жил идэвхтэй амьдрах боломжтой байсан байна. Тиймээс хөдөлмөрийн хөлсний хэмжээг тавь дахин үржүүлж буюу 111 сая 600 мянган төгрөгийг тухайн ар гэрт нь олгоно гэдэг хувилбар бий. Эдгээр аргачлалын аль ашигтайг нь хохирогчид үзүүлэх юм. Хүний амь насыг үнэлнэ гэдэг учир дутагдалтай зүйл. Гэхдээ дэлхий нийтэд ийм жишиг бий. Тухайлбал, БНСУ-д 80 сая вон, дэлхийн бусад улс оронд дээд хэмжээг нь 250 сая ам.доллароор тогтоосон байдаг.Ерөнхийдөө хэт өндрөөр биш, төлөгдөхүйц хэмжээнд байх ёстой гэдэг жишиг бий” гэж ярилаа.

Эх сурвалж:www.polit.mn