Б.ОД

Өсвөр үеийнхний хамтын оролцоог нэмэгдүүлж, тэдний идэвх санаачлагыг дэмжин, зорилтот сэдвийн хүрээнд суралцаж, хөгжих боломжийг олгох, шийдвэр гаргах түвшинд тэдний дуу хоолойг хүргэх зорилготой “Өсвөрийн Парламент” хөтөлбөр нийслэл хот болон хөдөө орон нутгаас шалгарсан 90 гишүүнтэйгээр өнгөрсөн аравдугаар сард нээлтээ хийсэн.

УИХ-ын дарга Г.Занданшатарын санаачилгаар УИХ-ын Тамгын газраас хэрэгжүүлж буй энэ хөтөлбөрийн хүрээнд парламентын боловсрол, уур амьсгалын өөрчлөлт гэсэн сэдвээр оролцогч хүүхдүүд цуврал хичээлд хамрагдаж, үеийнхэндээ сургалт зохион байгуулахаас эхлээд орон нутагтаа нөлөөллийн ажлуудыг үе шаттайгаар амжилттай хэрэгжүүлжээ.

Өсвөрийн парламентын гишүүд удаа зөв хооллох дадал, шим тэжээлийн хэрэглээний цэгцтэй мэдлэгийг түгээх, эрүүл амьдралын хэвшлийг төлөвшүүлэх зорилготой  “Эрүүл хооллолт-Эрүүл ирээдүй” сэдэвт дэд хөтөлбөрөө эхлүүлж байна. Хоёр сарын турш үргэлжлэх  хөтөлбөрийг НҮБ-ын Хүүхдийн сан, НҮБ-ын Хүнс, хөдөө аж ахуйн байгууллага, “Пийпл Ин Нийд” олон улсын байгууллага, НЭМҮТ бусад дэмжигч газрууд хамтран хэрэгжүүлэхээр болсон байна.

Судалгаанаас үзэхэд, манай улсад 10-19 насны хүүхдийн 13.9 хувь нь илүүдэл жинтэй, 4.2 хувь нь таргалалттай байна. Түүнчлэн өсвөр үеийнхний 38.5 хувь нь өглөөний цайгаа уудаггүй, 85 хувь нь ус, шингэн зүйлсийг бага хэрэглэдгээс гадна гурван хүүхэд тутмын хоёр нь чихэр, шоколад зэрэг сахарын агууламж ихтэй хүнсийг өдөр бүр хэрэглэдэг гэжээ. Энэ удаагийн уулзалтад хөдөө орон нутгаас 60 хүүхэд цахимаар оролцож, мөн эцэг эхчүүдийн төлөөлөл гэр бүлийнхээ хооллолтод хэрхэн анхаардаг талаар санал, туршлагаа солилцсон юм.

Өсвөрийн парламентын гишүүн П.Түвшин “Хүүхдүүд эрүүл, ухаалаг сонголт хийхийн тулд эхлээд үнэн бодит эх сурвалжаас, өөрт тохирсон хялбар хэрэгслээр хэрэгтэй мэдээллээ тогтмол авч, дадал хэвшил болгох нь чухал. Яг энэ зорилгоор эрүүл хооллолтыг хэвшүүлэх уриалга, санамж, видео хичээл зэрэг контент бүхий платформыг хөгжүүлэхээр ажиллаж байна” гэж ярилаа.  

Улс орны хүн амын дундаж наслалт, эрүүл мэндийн байдал нь хүүхэд, өсвөр үеийн эрүүл мэндтэй шууд холбоотой бөгөөд ихэнх архаг өвчний үндэс суурь энэ насанд тавигддаг. “Эрүүл хооллолт-Эрүүл ирээдүй” хөтөлбөрийн үр дүнд хоол хүнсний бүтээгдэхүүний зөв тогтолцоо, аюулгүй байдал, үр нөлөө, зохистой хэрэглээнд суралцаж, хүнсний хог хаягдлыг багасгах талаар нэгдсэн ойлголттой болохоос гадна хувь хүний хөгжлийн цуврал хичээлүүдэд хамрагдах юм.

Мөн дэлхийн улс, орнуудад хүүхэд, залуучуудын парламентын боловсролыг дээшлүүлэх, шийдвэр гаргах түвшинд тэдний дуу хоолой, оролцоог нэмэгдүүлэх зорилгоор олон талт хөтөлбөрүүдийг хэрэгжүүлдэг байна.  Жишээлбэл, Исланд улсад 13-15 насны хүүхдүүдийн бүлэг хууль тогтоох байгууллагаас боловсруулсан хуулийн төслүүдэд саналаа өгөх зарчмаар ажилладаг байна. Энэ нь хүний эрх, ардчиллыг дээдэлсэн, ёс зүйн төлөвшилтэй, бүтээлч, мэдлэгтэй хойч үеийг бэлтгэх суурь болдог гэж үздэг.

Эх сурвалж:www.polit.mn