Б.ДОЛЖИНЖАВ

Гадаадын тагнуултай хамтарч ажилласан хэргээр Тагнуулын ерөнхий газарт шалгагдаж байгаа иргэн Ч.Мөнхбаярын өмгөөлөгч  А.Батдорж, Г.Баасан нар өнөөдөр Үндэсний мэдээллийн төвд мэдээлэл хийлээ. Тэдний зүгээс  Ч.Мөнхбаярыг гүтгэсэн, гэм буруугүй хэмээн үзэж байгаа юм байна.

Энэ талаар өмгөөлөгч Г.Баасан “Тагнуулын байгууллагаас хоёрдугаар сарын 18-нд “Иргэн Ч.Мөнхбаяр нь гадаадын тагнуулын байгууллагын үүрэг даалгавар, санхүүжилтээр хууль бусаар хамтран ажилласан нь тогтоогдсон тул мөрдөн шалгах ажиллагааг  явуулж эхэллээ. Баривчилгаа, нэгжлэгийг прокурорын зөвшөөрөлтэйгээр хийсэн. Иргэн М нь гадаадын тусгай албан байгууллагатай багагүй хугацаанд хамтран ажиллаж, тэдгээрийн үүрэг даалгаврыг биелүүлж мөнгөн урамшууллыг тогтмол авч байсан нь үйлдэл дээрээ баригдсан. Түүний гэрт нэгжлэг хийх явцад их хэмжээний валют баримт илэрснийг эд мөрийн баримтаар хураан аваад байна” гэж мэдээлсэн. Энэ нь Ч.Мөнхбаярыг гарцаагүй ял авах нь гэсэн ойлголтыг нийгэмд төрүүлж, Эрүүгийн хэрэг хянан шийдвэрлэх тухай хуулийн 1.15 дугаар зүйлийн нэгд заасан “Шүүхийн шийтгэл тогтоол гарах хүртэл хүн, хуулийн этгээдийг гэмт хэрэг үйлдсэн гэм буруутайд тооцохгүй” гэснийг санаатайгаар зөрчсөн. Тагнуулын байгууллагаас гадаадын тагнуулын албатай хамтарч ажилласан гэж баримтаар нотлогдоогүй мэдээлэл түгээж, сүр бадруулан баривчилж, яллана гэж заналхийлсэн. Мөн Монгол Улсын ямар эрх ашгийг хохироосон нь тодорхойгүй байна. Гадаадын тагнуулын байгууллага гэдгийг Ч.Мөнхбаяр огт мэдээгүй. Харин тагнуулын байгууллага мэдсэн мөртлөө гэмт хэргээс урьдчилан сэргийлэх үүргээ хэрэгжүүлээгүй. Гадаадын тагнуулаа бариагүй мөртлөө зөвхөн иргэнээ баривчилж, маргааш нь шууд гэмт хэрэгтэн гэж зарласан нь захиалгат хэлмэгдүүлэлт гэж хардахад хүргэж байна. Ч.Мөнхбаяр нь гадаадын тагнуул гэдгийг огт мэдээгүй ч яллагдагчаар татагдаж байгаа нь ганцхан түүний асуудал биш” гэж ярилаа.

 Эх сурвалж:www.polit.mn