Ц.БАЯР

Олон улсын эмэгтэйчүүдийн эрхийг хамгаалах өдрийг тохиолдуулж дэлхий даяар  гуравдугаар сарын 7-14-ний өдрүүдэд “SSE" /НҮБ-ын Тогтвортой хөрөнгийн биржийн санаачилга/- ын гишүүн дэлхийн 120 гаруй хөрөнгийн биржүүд нэгдэн хэрэгжүүлдэг Жендэрийн эрх тэгш байдлын төлөө цан цохих “Ring the bell” арга хэмжээг зохион байгуулж байна. Найман жил болж буй энэ арга хэмжээг “Улаанбаатар үнэт цаасны бирж”  өнөөдөр “Central Tawer”- т зохион байгуулж манай хөрөнгийн зах зээлийг хөгжүүлэхийн төлөө  түүчээлэн манлайлагч эмэгтэйчүүд оролцож цан цохисон юм. Цан цохих ёслолд  хөрөнгийн зах зээлийн манлайлагч эмэгтэйчүүд болох “Улаанбаатар үнэт цаасны бирж”-н  захирал Ж.Золзаяа, Ард санхүүгийн нэгдлийн төр засаг, олон нийтийн харилцаа эрхэлсэн захирал Ж.Алтангүний, Эрсдэл хариуцсан захирал Б.Оюутцэцэн, “Монголын үнэт цаасны клирингийн төв”-ийн захирал О.Эрдэнэгэрэл, “Грэйпсити монгол”-ийн  захирал Б.Мөнхцэцэг, “Ард секюритиз ҮЦК”-ийн захирал Г.Долгорсүрэн, “Нэрэн клиринг”-ийн захирал Б.Гандулам, “Ард менежмент ҮЦК”-ийн захирал Ч.Хандаа нар оролцож “Жендэрийн мэдрэмжтэй санхүүгийн салбарын төлөө” дуу хоолойгоо өргөж, санал солилцов.

Энэ үеэр “Улаанбаатар үнэт цаасны бирж” – ээс  гуравдугаар сарын  8-ны өдөр НҮБ-ын Тогтвортой хөрөнгийн биржийн санаачилгын хүрээнд хийгдсэн “How stock exchanges advance gender equality” буюу “Хөрөнгийн биржүүд хэрхэн жендэрийн эрх тэгш байдлыг хангахад хувь нэмрээ оруулж манлайлдаг вэ” тайланг танилцуулсан юм. Тайланд дурдсанаар дэлхий даяар 92 тэрбум триллион долларын зах зээлийн үнэлгээтэй нийт 50 гаруй мянган компаниудыг биржүүд бүртгэсэн бөгөөд улс орнуудын эдийн засагт голлох нөлөөтэй ба шууд болон шууд бус замаар бүртгэлтэй компаниудын үйл ажиллагаанд нөлөө үзүүлж, жендэрийн эрх тэгш байдлын төлөө ажиллаж, илүү үр ашигтай, уялдаа холбоотой үр ашигтай нэгдмэл нийгмийг бий болгоход хувь нэмрээ оруулдаг байна. Мөн тус тайланд олон улсын биржүүдийн тэргүүн туршлага болон биржүүдийн жендэрийн эрх тэгш байдлын төлөө хийх боломжит ажлуудыг танилцуулжээ. Хөрөнгийн биржүүд жендэрийн эрх тэгш байдлыг дэмжин ажиллах талаар зургаан зүйлийг онцолсон байна. Үүнд, үйл ажиллагаагаараа үлгэр жишээ үзүүлэх, зохицуулалт, зааварчилгаагаар бүртгэлтэй компаниудын үйл ажиллагаанд нөлөөлөх,жендэрийн мэдрэмжтэй бүтээгдэхүүнийг бүртгэж, олон нийтэд таниулахын зэрэгцээ компанийн гүйцэтгэх удирдлагын түвшинд эмэгтэйчүүдийн оролцоог нэмэгдүүлэхийг дэмжих гэсэн байна. Мөн жендэрийн тэгш байдлыг дотооддоо дэмжих тухайлбал, цалингийн зөрүүг арилгах, дарамтаас урьдчилан сэргийлэх, жендэрийн тэгш байдлын талаарх ахиц дэвшлийг үнэлж, ил тод болгох гэх мэт. Жендэрийн тэгш оролцоог хангах нь хүний эрх, эрх чөлөөний шударга зарчмыг хэрэгжүүлэхийн зэрэгцээ бизнесүүд, байгууллагууд бүх хүчин чадлаа дайчлан ажиллах, ажлын үр дүнг үнэмлэхүй хэмжээнд нэмэгдүүлдэг. Иймд Монголын хөрөнгийн зах зээлийн жендэрийн мэдрэмжтэй тэгш оролцоог хангаж ажиллахыг хөрөнгийн зах зээлийн оролцогч бусад байгууллагууд, бүртгэлтэй хувьцаат компаниуд болон гишүүн компаниуддаа хандан Улаанбаатар үнэт цаасны бирж ХК-ийн зүгээс уриаллаа. 

Эх сурвалж: www.polit.mn