Б.ОД

Олон улсын эмэгтэйчүүдийн эрхийг хамгаалах өдрийг угтан НҮБ-ын Ерөнхий нарийн бичгийн дарга Антонио Гутерреш эмэгтэйчүүдийн эрхийг хангах, цар тахлын дараах сэргэлтийн үйл явцад эмэгтэйчүүдийн манлайллыг дэмжих чиглэлээр дэлхийн улс орнуудад хандан уриалжээ.

Тэрбээр “Дэлхий нийтээрээ олон улсын эмэгтэйчүүдийн эрхийг хамгаалах өдрийг тэмдэглэх гэж буй энэ цаг үед эмэгтэйчүүдийн эрхийг хамгаалах чиглэлээр өмнө хүрсэн амжилтаасаа ухарч байгаад миний бие харамсаж байна. Үүний хохирлыг бид бүгдээрээ амсаж байна. Сүүлийн жилүүдэд тохиосон шил шилээ дарсан хямралууд нь эмэгтэйчүүдийн манлайлал хэзээ хэзээнээс илүү чухал болохыг харууллаа. Эмч, сувилагч, нийгмийн эрүүл мэндийн болон нийгмийн халамжийн ажилтнууд цар тахлын эсрэг баатарлагаар тэмцэж байна. Гэтэл үүний зэрэгцээ, эмэгтэйчүүд, охид хамгийн эхэнд ажлын байраа алдаж, сургуулиа орхиж, цалингүй гэр орны болон үр хүүхэд, дүү нараа асран халамжлах ажил хийхээс өөр аргагүй нөхцөлд хүрч байна. Мөн охид эмэгтэйчүүдийн эсрэг гэр бүлийн болон цахим хүчирхийлэл огцом нэмэгдсэний зэрэгцээ олон охин хүүхэд насандаа гэрлэх сорилттой тулгарч байна. Этиопоос Афганистан болон өнөөдрийн халуун бүс болоод буй Украин гээд зөрчил мөргөлдөөнтэй бүс нутагт охид эмэгтэйчүүд хамгийн эмзэг байдалд байгаа ч тэдний энхийн төлөөх дуу хоолой хамгаас илүү чанга, хүчтэй сонсогдож байна. Иймд бид охид, эмэгтэйчүүдийн тэгш эрхийг хангах асуудлыг анхаарлынхаа төвд тавьсан феминист сэтгэлгээг сэргээж байж  ирээдүйд бүх нийтийн тогтвортой, эрх тэгш сэргэлтийг авчрах боломжтой. Төрийн болон бизнесийн салбарыг манлайлдаг, бүх нийтэд ашиг тусаа өгөх ногоон, нийгмийн дэвшилтэт бодлого боловсруулж, хэрэгжүүлдэг илүү олон эмэгтэй бидэнд хэрэгтэй байна. Тухайлбал, парламентад эмэгтэйчүүд илүү олон байснаар, уур амьсгалын өөрчлөлтийн чиглэлээр илүү эрүүл амлалт авах, эрүүл мэнд, боловсролын салбарт илүүтэй хөрөнгө оруулалт хийх асуудал шийдэгддэг гэдгийг бид мэднэ” гэж ярьжээ.

Эх  сурвалж:www.polit.mn