Б.ОД

Гадаад харилцааны яамнаас Украин дахь иргэдийг татан авах ажлын талаар өнөөдөр мэдээлэл хийлээ.  Манай улс хоёрдугаар сарын 24-нөөс хойш 24 иргэнийг аюулгүй бүсэд оруулсан. Үүнээс гурван иргэн өчигдөр Монголд иржээ. Мөн Харьковт байгаа иргэдээс 15 нь гуравдугаар сарын 3-нд Монголд ирэх юм байна.

Энэ талаар ГХЯ-ны Төрийн нарийн бичгийн дарга Н.Анхбаяр "Украин Польш улсын хил дээр найман иргэн ирсэн. Элчин сайдын яамны ажилтнууд хилийн зурвас руу орж авахаар ажиллаж байна. Харьков хотод 23 хүн байна. Үүнээс 18 нь оюутан бөгөөд  бүгд хоргодох байранд байгаа. Нөхцөл байдал тэнд маш хүнд байна. Харьков хот руу орох гарах хөдөлгөөн бүрэн хаагдсан. Олон улсын шилжилт хөдөлгөөний байгууллагатай бид холбоотой ажиллаж байна.  Газар дээр нь ГХЯ, Унгар, Чех улсаас тус бүр хоёр ажилтан нэмэлтээр хил хооронд ажиллаж байгаа. ОХУ-руу гарах боломж бүрдвэл бэлэн байдлыг хангах үүднээс Москва дахь Элчин сайдын яамнаас дөрвөн хүний бүрэлдэхүүнтэй баг ОХУ-ын хилийн талд хүлээлтийн байдалтай байна. Оюутнуудын Монгол дахь данс руу тус бүр 1.2 сая төгрөгийг шилжүүлсэн. Мөнгөнөөс гадна тухайн газарт бараа бүтээгдэхүүн худалдаж авах нөхцөл байдал хүнд байгаа. Гадаад харилцааны яам тэд хоногийн дотор оюутнууддаа хоол хүргэж өгнө гэж хэлж чадахгүй. Аль ч улсын гадаад яам үүнийг тодорхойлж чадахгүй байна. ОХУ-д Монгол Улсын 5000 орчим иргэн бий. Элчин сайдын яамнаас тухайн иргэдтэй холбогдон байнгын холбоотой ажиллаж байгаа” гэв.

Эх сурвалж:www.polit.mn