З.БАТЦЭЦЭГ
-Германы канцлер асан тансаг зэрэглэлийн үл хөдлөх хөрөнгөтэй болохыг эрмэлздэггүй байна-
67 настай Ангела Меркель Берлин хотын хойд хэсэгт том байртай. Хэдийгээр тэрээр их орлоготой ч, түүний өмчийг тансаг гэж нэрлэх аргагүй юм. Ангелагийн олон жил амьдарсан уг орон сууцны барилга Шпрее голын эрэг дээр байрладаг. Уг байшин хашаа, өргөст тороор хүрээлэгдээгүй. Улстөрчийн хөршүүд нь жирийн иргэд бөгөөд эргэн тойронд ресторан, бэлэг дурсгалын дэлгүүр, супермаркетууд байдаг. Аюулгүй байдлын үүднээс байрны үүдэнд цөөхөн хэдэн цагдаа л жижүүрлэдэг. Гаднах төрхөөрөө энэ барилга нь 1940-өөд оны Сталины үеийн барилгуудыг санагдуулдаг. Ангела дөрөвдүгээр давхарт амьдардаг байна. Тэрбээр нөхөртэйгөө энэ байранд канцлер болохоосоо өмнө нүүж ирсэн. Канцлер болоод улсын хангамжийн байранд нүүж орохоосоо татгалзан гэртээ үлдсэн нь олон хүний хүндэтгэлийг хүлээсэн.
Гүүгл карт дээр байшинг олоход их амархан. Аюулгүй байдлын алба канцлерт тэмдгийг арилгахыг санал болгосон боловч тэр татгалзсан, учир нь олон хүн түүний хаана амьдардагийг угаасаа мэддэг. Тэр мөн хотын захад том байшинтай. Гэхдээ тэр нь зарим улстөрчийн гэр шиг тийм тансаг орд харш биш. Тансаг орчин үеийн хотхонд биш, Берлинээс хэдхэн цаг яваад хүрчихдэг энгийн Хоэнвальд тосгонд байдаг. Энэ газар А.Меркелийн хүүхэд нас өнгөрсөн. Одоог хүртэл зав гарвал тосгон дахь байшиндаа очиж, хотын дуу чимээнээс хол амардаг. Тэрбээр хашаандаа мод цэцэг тарих дуртай.
Oldenburg YouTube шоуны зургаас
Дунджаар 300 мянган еврогийн орлоготой хатагтай яагаад үнэтэй байшин, усан онгоц авдаггүй юм бол гэж олон хүн гайхдаг. Германчууд түүнийг хувцаснаас эхлээд амьдрах байраа сонгох хүртлээ даруухан байдагт нь их бахархдаг.
Эх сурвалж: www.wday.ru