Л.ХЭРЛЭН

УИХ-ын гишүүн, Боловсрол, соёл, шинжлэх ухааны байнгын хорооны дарга Г.Дамдинням  цар тахлын жилүүдэд сонгогчиддоо  тайлангаа цахимаар хүргүүлж, шинэ жишиг бий болгож байв. Тэрбээр энэ удаа  УИХ-ын намрын чуулганы хугацаанд хийж хэрэгжүүлсэн ажлуудаа тайлагнажээ. Түүний хувьд өнгөрсөн хугацаанд Дархан-Улаанбаатарын замын бүтээн байгуулалтын асуудалд анхаарал хандуулж, шат шатанд хийх хугацаат ажлын чанар, биелэлтэд хяналт тавьж ажилласан юм. Тайланд дурдсан ажлуудыг товчлон хүргэвэл:

-УИХ-ын гишүүний үндсэн үүрэг болох хууль санаачлах, батлуулах, хуулийн хэрэгжилтэд хяналт тавих ажлуудаа үргэлжлүүлж байна.

-Тойрогтоо буюу Дархан-Уул аймагтаа тулгамдсан гол асуудлуудыг Засгийн газар, УИХ-аар шийдвэрлүүлэх чиглэлд хичээн ажиллалаа.

-УИХ-ын БСШУС-ын Байнгын хорооны даргаар томилогдсоноор сүүлийн 26 жил өөрчлөлт ороогүй байсан Соёлын тухай хууль, Кино урлагийг дэмжих тухай анхдагч хуулийг тус тус батлуулахад голлох үүрэгтэй оролцов.

-Монгол орны ирээдүйн хөгжилд нэн чухал үүрэгтэй Боловсролын багц хуулийн төслийг УИХ-аар хэлэлцүүлэн батлуулах үүрэг бүхий ажлын хэсгүүдийг нэгтгэн зангидаж, чиглүүлэх үүрэг хүлээн идэвхийлэн ажиллалаа. Бүх оролцогч талуудын хэлэлцүүлэг, уулзалтууд хийж,  бичгээр ирсэн 60.000 орчим, уулзалтаар ирсэн 10.000 гаруй саналуудыг нэгтгэх ажил ид үргэлжилж байна.

-УИХ-ын чуулганаас гадна гурван  байнгын, нэг түр,  хоёр дэд хороо болон 14 ажлын хэсэг, 16 парламентын бүлэгт харъяалагдан ажиллахын зэрэгцээгээр нийт 400 гаруй албан хүсэлтэд хуулийн хүрээнд хариу хүргүүлэн шийдвэрлэжээ.

-Дарханчуудынхаа итгэлийг хүлээн төрдөө хамтран зүтгэж буй Сангийн сайд Б.Жавхлан, АБГБ-ын Байнгын хорооны дарга Б.Баттөмөр нарын хамтаар Монгол Улсын 2022 оны улсын төсөвт тойрогтоо хэрэгжих нийт 51 төсөл хөтөлбөрт 130 гаруй тэрбум төгрөгийн хөрөнгө оруулалт суулгаж батлууллаа.

-Боловсролын шинэчлэл, Шүүхийн шинэтгэл, Төрийн албаны шинэчлэл, Төрийн өмчийн бодлого зэрэгт түлхүү анхаарч ажилласаар байна” гэжээ.

Эх сурвалж: www.polit.mn