Ч.ЗОТОЛ

Дарханы замын бүтээн байгуулалтад хяналт тавих, эрчимжүүлэх, үүрэг чиглэл өгөх  УИХ-ын Ажлын хэсгийг тус тойргоос сонгогдсон Г.Дамдинням гишүүн ахалж байгаа юм.  Тэрбээр УИХ-ын гишүүн Ч.Ундрам, Д.Батлут, Ж.Батжаргал нарын хамт ЗТХЯ-ны холбогдох албан тушаалтнуудтай уулзаж, ажлын явц, гүйцэтгэл, чанар, төлөвлөлт зэрэг  асуудлыг хөндөн санал солилцсон. Үүний дараа  таван  чиглэлээр салбарын яаманд  үүрэг өгчээ. Үүнд:

1. Барилгын ажил эхлэхийн тулд өвөл сайн төлөвлөж байж хавар, зун, намар ажил амжилттай явдаг. Иймд  цар тахлын  үеийн нөхцөл байдлыг тооцоолж, гаднын мэргэжилтнүүдийг авчрах, бараа материал, тоног төхөөрөмж татан авах ажлыг  эртнээс  төлөвлөж, ид ажлын үед энэ талын бэрхшээл гаргахгүй байдлаар төлөвлөлт хийж ажиллах;

2. Азийн хөгжлийн банкны I ,III, IV багцын  гүйцэтгэгчидтэй хийсэн гэрээнд замын баталгаат хугацааг нэг жил гэж тусгасан бөгөөд энэ нь хөдөлгөөн нээснээс хойш тооцогдсоноор өдгөө  зам нь бүрэн дуусаагүй байхад баталгаат хугацаа нь дуусах нөхцөл үүссэн. Гэтэл зарим хэсгүүдийн ажлын чанар  муу гүйцэтгэлтэй байгаа. Иймд баталгааны хугацааг хуулийн дагуу  гурван  жил болгож сунгах чиглэлд гүйцэтгэгчидтэй  ярилцаж тохирох;

3. Замуудын гүйцэтгэлийн хяналт хангалтгүй байгаа гэж үзэж байгаа тул хоёр  урсгал 10 багц 400 гаруй км замын гүйцэтгэлийг бүхэлд нь хариуцан хяналт тавьж зөвхөн Азийн хөгжлийн банкны  хяналтын төлбөрт 4.5 сая ам.доллар авч байгаа компанитай хийсэн гэрээгээ үнэлж дүгнэн  УИХ-ын Ажлын хэсэгт танилцуулах;

4.Иргэдийн хөндлөнгийн хяналтыг бий болгож талбай дээр ажиллаж байгаа машин техник, хүн хүчний мэдээлэл, чанарт хяналт тавих боломжийг хангах;

5. Тус замуудын ажлын гүйцэтгэгчдийг сонгон шалгаруулахаас эхлээд одоо болтол гарсан алдаа дутагдлуудын хариуцах эздийг хууль хяналтын байгууллагаар шалгуулах бэлтгэл хангаж Ажлын хэсэгт танилцуулах зэрэг үүрэг өгчээ.  

Яамны удирдлагуудын өгсөн мэдээллээр төслийн нийт гүйцэтгэл 49.05 хувьтай байгаа бөгөөд Ерөнхий сайдын үүрэг болгосны дагуу  ирэх аравдугаар  сард бүтээн байгуулалтын ажлыг дуусгаж, тээврийн хэрэгслийн хөдөлгөөнийг нээхээр ажиллаж байгаа гэв.

Г.Дамдинням гишүүний хувьд тус тойргоос УИХ-ын ээлжит сонгуульд  нэр дэвшин  сонгогдсоноос хойш Дарханы  замын  бүтээн байгуулалтын асуудлыг хөөцөлдөж, газар дээрээс нь байнга мэдээлэл хийж, хяналт тавин ажиллаж ирсэн.

Тэрбээр “4-5 жилд нийт ажлынхаа дөнгөж талд нь орсон төсөл энэ онд багтаж дуусна гэдэгт үнэхээр эргэлзэж байна. Хэрэв энэ хугацаандаа дуусгамаар байвал ЗТХЯ маш сайн менежмент, ялангуяа эрсдлийн үеийн зөв төлөвлөлттэй байх шаардлагатай. Өмнөх шигээ өөрсдийн алдаагаа ковид, бороо руу чихээд суугаад байж болохгүй.  Ямартай ч энэ замыг дуусан дуустал бид төлөвлөлт, гүйцэтгэлд нь хяналтаа тавьж, шахаж шаардан ажиллах болно” хэмээн байр сууриа илэрхийллээ.

Эх сурвалж: www.polit.mn