Ч.ЗОТОЛ

Хилийн боомтын үйл ажиллагааг сайжруулах, урд хил дээр гацсан бараа эргэлтийн асуудлыг нааштай шийдэх  Ажлын хэсэг Ерөнхий сайдын тушаалаар байгуулагдсан.  Шадар сайд С.Амарсайханаар ахлуулсан тус  ажлын хэсэг Замын-Үүд, Эрээний хилийн боомт дахь асуудлыг Хятадын талтай нааштайгаар шийдвэрлэж, ачаа тээврийн урсгалыг эрчимжүүлэх зорилготой ажлаа эхлүүлээд удаагүй байна. Гол нь  хилийн боомтын захиргааг удирдлага, зохион байгуулалтаар хангах цогц арга хэмжээг шуурхай авч хэрэгжүүлнэ гэдгээ мэдэгдээд байсан юм. Тэгвэл ажлын хэсэг өнөөдөр /2022.01.09/ хуралджээ. Үүгээр  БНХАУ-ын холбогдох байгууллагуудтай чиглэл, чиглэлээр яриа хэлэлцээрийг шуурхай зохион байгуулах ажлын төлөвлөгөөг батлан хэрэгжүүл гэсэн үүрэг даалгаврыг холбогдох албаныханд өгсөн байна.

Хил, гааль дээр гарч байгаа  асуудлаар тээвэрчид Зам, тээврийн хөгжлийн яамны гадна өнгөрсөн долоо хоногт жагсч, мэдээлэл хийхдээ жолооч нарын эрх ашигт нийцсэн зөв зохион байгуулалттай арга хэмжээ авах хэрэгтэйг шаардсан юм. Харин худалдаа эрхлэгчдийн зүгээс Монгол руу ачуулсан   чингэлэг, бараа хил дээр гацаж, ямар ч орлогогүй, түрээс төлөх нөхцөл хүндэрсэн тул жагсаал цуглаан хийгээд зогсохгүй өлсгөлөн зарлах хүртэл байдал хүндрэхээр байгаа гэдгийг хэлж байгаа юм.

Эх сурвалж: www.polit.mn