Ч.ЗОТОЛ

Засгийн газрын өнөөдрийн  ээлжит хуралдаанаар Ерөнхий сайд Л. Оюун-Эрдэнэ УБ-Дархан чиглэлийн авто замын бүтээн байгуулалтын ажлыг 2023 оны аравдугаар сараас хэтрүүлэхгүй дуусгах үүрэг, чиглэлийг ЗТХ-ийн сайд Л.Халтарт өгчээ.  Тус тойргоос сонгогдсон УИХ-ын гишүүн Г.Дамдинням  өөрийн цахим хуудаст энэ талаар дурдахдаа  “Ажлаа хийж чаддаггүй хүнд их л урт хугацаа өгсөн байна даа...” хэмээн жиргэжээ. Тэрбээр  өнгөрсөн хугацаанд УБ-Дархан чиглэлийн авто замын бүтээн байгуулалтын ажлын явцыг байнга мэдээлж, сонгогчдынхоо өмнөөс  энэ ажлыг хугацаанд нь чанартай хийж дуусгахыг салбарын  яамнаас шахаж шаардаж ажилласан юм. Түүний хувьд  дөрвөн асуудлаар шүүмжлэлтэй хандаж, хариуцлага нэхжээ. Үүнд:

-Уг замын ажил удааширснаас болж иргэд эрүүл мэнд, амь нас, эд хөрөнгөөрөө хохирсоор байгаа тул тойргоос сонгогдсон гишүүний хувьд үргэлж анхаарч Ерөнхий сайд болон ЗГ, Байнгын хороод, чуулганы хурлуудад асуудал тавьсаар ирсний үр дүнд өнгөрөгч онд ажил хамгийн их ахисан ч төлөвлөлтөндөө хүрээгүй.

-Нийтдээ 400 гаруй км Азийн Хөгжлийн банк болон ЕСБХБ-ны санхүүжилттэй тус бүр тав, нийт 10 багц хоёр  тусдаа урсгал бүхий замын ажлын дөнгөж гурван  багц нь л дуусах шатандаа орсон бол үлдсэн долоон  багцын ажил дуусах яагаа ч үгүй байна.

-Замын ажил дуусахыг  хоног тоолон хүлээн суугаа бидэнд 2023 оны сүүлч хол сонсогдож байгаа хэдий ч Ерөнхий сайдын зүгээс энэ асуудалд анхаарал хандуулж салбарын сайдад маш тодорхой хугацаатай үүрэг даалгавар өгчээ. Энэ хугацаанаас өмнө заавал дуусгуулах хэрэгтэй. Хэрэв чадахгүй бол ЗТХ-ийн сайд нь үнэнээ хэлээд болих хэрэгтэй.

-УИХ-ын Эдийн засгийн Байнгын хорооноос гаргасан тогтоолын дагуу миний бие ажлын хэсэг ахлан ажиллаж байгаа бөгөөд салбарын сайд болон холбогдох албан тушаалтнуудыг шахаж шаардаж, олон нийтийн хяналт, оролцоог дэмжин ажиллах болно хэмээн УИХ-ын гишүүн Г.Дамдинням байр сууриа илэрхийлжээ.

Эх сурвалж: www.polit.mn