Б.ОЧИР

Хотын дарга асан Э.Бат-Үүлийг албан тушаалаа урвуулан ашигласан хэргээр 1702000000024 дугаартай эрүүгийн хэрэг үүсгэн шалгасан. Уг хэрэгт 11 хүн холбогдсон байдаг. Анх Э.Бат-Үүлийг эрх мэдлээ урвуулан ашиглаж, ТОСК-ын гүйцэтгэх захирал А.Гантулгыг удаа дараа дарамтлан Хөгжлийн банкнаас орон сууц барих зориулалтаар олгосон зээлийн хөрөнгөөс есөн тэрбум төгрөгийг “Бэрэн групп” рүү шилжүүлэх шийдвэр гаргуулсан гэх үндэслэлээр шалгаж эхэлсэн юм. Улмаар тус групп нь Э.Бат-Үүлийн хүү Б.Чулуудайн эзэмшдэг “Гранд лайн” ХХК-ийг 5.5 тэрбум төгрөгөөр худалдан авч улсын төсөвт их хэмжээний хохирол учруулсан хэрэгт аав, хүү хоёрыг яллагдагчаар татсан билээ.

Э.Бат-Үүл, Б.Чулуудай нартай хамт "ТОСК” ТӨҮГ-ын захирлаар ажиллаж байсан А.Гантулга, Нийслэлийн Засаг даргын Тамгын газрын даргаар ажиллаж байсан Ё.Гэрэлчулуун “ТОСК” ТӨҮГ-ын маркетинг, борлуулалтын хэлтсийн даргаар ажиллаж байсан Т.Гэрэлт-Од, Гэр хорооллын хөгжлийн газрын даргаар ажиллаж байсан Ш.Ганхуяг, ТОСК” ТӨҮГ-ын дэд захирлаар ажиллаж байсан Д.Оюунжаргал, "Бэрэн групп” ХХК-ийн ерөнхий захирал ажилтай Б.Мөнхтөр, "Могул скай” ХХК-ийн захирлаар ажиллаж байсан Д.Жаргалсайхан, "ТОСК” ТӨҮГ-ын ерөнхий нягтлан бодогчоор ажиллаж байсан Ю.Алтангэрэл нар эрүүгийн хариуцлагад татагдан шалгуулжээ. Э.Бат-Үүлд 2002 оны Эрүүгийн хуулийн тусгай ангийн 263 дугаар зүйлийн 263.2 дахь хэсэг, мөн хуулийн 265.2 дахь хэсэгт зааснаар яллах дүгнэлт үйлдсэн бол түүний хүү Б.Чулуудайд 2002 оны Эрүүгийн хуулийн тусгай ангийн 263 дугаар зүйлийн 263.2 дахь хэсэгт зааснаар яллах дүгнэлт үйлдэж шүүхэд шилжүүлээд байсан юм.

Тэгвэл уг хэргийг Чингэлтэй дүүргийн Эрүүгийн хэргийн анхан шатны шүүх өнөөдөр шийдлээ. Шүүхээс Э.Бат-Үүлд дөрвөн жил хорих, гурван жил нийтийн албанд томилогдох эрхийг хасах, А.Гантулгад таван жил хорих ял оноож, нийтийн албанд томилогдох эрхийг таван жилээр хасах шийтгэл оноов. Мөн Б.Чулуудайг 15 сая төгрөгөөр торгож, нийтийн албанд томилогдох эрхийг гурван жилээр хасах, Т.Гэрэлт-Одыг долоон сая төгрөгөөр, Д.Жаргалсайханыг 9.7 сая төгрөгөөр, Ю.Алтангэрэлийг 2.7 сая төгрөгөөр торгох шийтгэлийг тус тус оногдуулжээ. Харин Ё.Гэрэлчулуун, Ш.Ганхуяг, Д.Оюунжаргал, Б.Мөнхтөр нарын дөрвөн хүнд холбогдох хэргийг хэрэгсэхгүй болгосон байна.

Эх сурвалж: www.polit.mn