С.САРУУЛ

Сүхбаатар дүүргийн Онцгой байдлын хэлтсээс урьдчилан сэргийлэх нэгдсэн арга хэмжээ зохион байгуулсан талаар тус хэлтсийн Ангиллын сургалт сурталчилгаа, бие бүрэлдэхүүний сургалт хариуцсан мэргэжилтэн, дэслэгч Ш.Мөнгөн-Эрдэнэ “Хүйтний улирал эхэлсэнтэй холбоотойгоор гэр хорооллын айл өрхийн галлагаа ихэссэн энэ үед ахуйн түймэр, угаарын хийн хордлогоос урьдчилан сэргийлэх, гал түймрийн тоо хохирол, эрсдэлийг бууруулах зорилгоор нийслэлийн Онцгой байдлын газраас  ахуйн гал түймрийн аюулаас урьдчилан сэргийлэх “Мартаж болохгүй” аяныг 2021 оны 10 дугаар сарын 25-ны өдрөөс эхлүүлээд байгаа билээ.

Тус аяны хүрээнд Нийслэлийн Онцгой байдлын газрын даргын баталсан удирдамжийн дагуу Сүхбаатар дүүргийн 15, 17 дугаар хорооны айл өрхүүдэд ахуйн гал түймэр, угаарын хийн хордлогоос  урьдчилан сэргийлэх нэгдсэн арга хэмжээг 2021 оны 11 дүгээр сарын 13-ны өдөр зохион байгууллаа.

Нээлтийн арга хэмжээнд ОБЕГ-ын ГУСГ-ын дарга, хурандаа А.Алтанбагана, НОБГ-ын дарга, хурандаа А.Дашням, Сүхбаатар дүүргийн орлогч дарга Ц.Шижир, “Таван толгой түлш ХХК-ийн удирдлага, Хэрэглэгчдэд үйлчлэх албаны дарга Ч.Буянжаргал болон албаны бусад хүмүүс оролцлоо.

Арга хэмжээний хүрээнд мэргэжлийн байгууллагуудын хамтарсан бүрэлдэхүүн цахилгааны холболт, ашиглалт, угсралтын аюулгүй байдал алдагдсан, гэр хооронд, бусад объект хоорондын аюулгүйн зай хэмжээ зөрчигдсөн, үнс нурам ил задгай асгасан, үнсний сав таггүй, пийшин зуух гэмтэлтэй, яндангийн хамгаалалт хийгдээгүй, залгаас буруу, бага насны хүүхдийг гэртээ цоожилж орхидог, шуурхай албаны автомашин очих боломжгүй мухар гудамж, өндөрлөг газар, өндөр хүчдэлийн шугаман дор буусан зэрэг зөрчил илэрсэн айл өрхөд аюулгүй байдлыг хангах чиглэлээр зөвлөмж, анхааруулга өгч ажилласан юм.

Тус арга хэмжээнд  нийслэлийн Онцгой байдлын газар, төвийн 6 дүүргийн Онцгой байдлын хэлтсийн 307 алба хаагч, Сүхбаатар дүүргийн 15,17 дугаар хороодын 19 хэсгийн ахлагч, 55 сайн дурын ажилтан, Цагдаагийн газрын 15 алба хаагч, “Таван толгой түлш” ХХК-ны 40 ажилтан, Улаанбаатар цахилгаан түгээх сүлжээ ТӨХК-ны Сүхбаатар дүүрэг дэх хэрэлэгчдэд үйлчлэх төвийн 14 ажилтан,  нийт 450 хүний бүрэлдэхүүнтэй ажиллаж, хяналт шалгалтад 4215 айл өрх хамрагдахаас 89.8 хувь буюу 11124 ам бүл бүхий 3787 өрх хамрагдаж, галын аюулгүйн дүрэм, норм, стандартын холбогдох заалтыг зөрчсөн 2527 зөрчил илрүүлж, 264 зөрчил буюу  10.4 хувийг газар дээр нь арилгуулж, 3708 иргэнд галын аюулаас урьдчилан сэргийлэх, угаарын хийн хордлогоос урьдчилан сэргийлэх заавар зөвлөмж өгч, гарын авлага, санамж, сэрэмжлүүлэг материал 3860 ширхэгийг тараасан” гэлээ.

Эх сурвалж: www.polit.mn