Б.ОД
Энэ амралтын өдрүүдээр согтуугаар тээврийн хэрэгсэл жолоодсон 378 зөрчил бүртгэгдэж, 13 согтуу жолооч зам тээврийн осол гаргаж, бусдын амь нас, эрүүл мэнд, эд хөрөнгөд хохирол учруулсан гэж Тээврийн цагдаагийн албанаас мэдээллээ.
Нийслэлд тээврийн хэрэгсэл ашиглан гэмт хэрэг үйлдэж байгаа зөрчил, автомашины хулгай болон согтууруулах ундааны зүйл хэрэглэсэн үедээ зам тээврийн осол, гэмт хэргээс урьдчилан сэргийлэх зорилгоор шөнийн хяналт шалгалтыг явуулж эхэлжээ. Тус шалгалтыг Тээврийн цагдаагийн алба, Нийслэлийн цагдаагийн удирдах газрын дүүргүүд дэх цагдаагийн газар, Замын цагдаагийн хэлтэс, Шөнийн эргүүлийн хэлтсийн алба хаагчид хамтран зохион байгуулж байгаа юм.
Энэ оны эхний 10 сарын байдлаар архи согтууруулах ундааны зүйл хэрэглэсэн үедээ тээврийн хэрэгсэл жолоодож зам тээврийн осол гаргасны улмаас 92 хүн амиа алдсан бол 29040 согтуу жолоочид хуулийн дагуу арга хэмжээ тооцсон байна.
Иймд иргэд, жолооч та бүхэн архи согтууруулах ундааны зүйл хэрэглэсэн үедээ тээврийн хэрэгсэл жолоодохгүй байх, жолоодуулахгүй байх, таны эргэн тойронд энэ төрлийн зөрчил үйлдэгдэж байвал 102 дугаарын утсанд мэдээлэл өгөхийг цагдаагийн байгууллагаас уриалж байна.
Эх сурвалж:www.polit.mn