С.САРУУЛ
Монгол Улс өнөөдрийн байдлаар хүн амынхаа 69.3 хувийг коронавирусийн эсрэг вакцины нэгдүгээр тунд хамруулсан бол 65.8 хувь нь хоёрдугаар тунд хамрагджээ. Тэгвэл одоогоор 404939 иргэн дархлаа сэргээх тун буюу вакцины гурав дахь тунг хийлгэжээ. Энэ тухай Эрүүл мэндийн яамны хэлтсийн дарга Д.Баярболд “Сүүлийн өдрүүдэд иргэд вакцины гурав дахь тунд хамрагдах идэвх нэмэгдэж байна. Энэ нь гурав дахь тун нь дельта вирусийн давлагааг багасгаж, халдварыг хумихад чухал үүрэгтэй гэдгийг ойлгожээ гэж харж байна. Мөн манай улсад 100,000 гаруй иргэн вакцины нэгдүгээр тунд хамрагдаад хоёрдугаар тунг хийлгээгүй байсан. Энэ нь хоёр дахь тунгаа өөр вакцин хийлгэх хүсэлтэй байсантай холбоотой. Энэ асуудлыг шийдвэрлэх үүднээс нэгдүгээр тунд хамрагдсан тухайн иргэд гурваас дээш сарын хугацаа өнгөрсөн тул хоёрдугаар тунг Синофарм болон Pfizer үйлдвэрийн вакцинаас сонгон хийлгэх боломжтой болсон. 5-11 насны хүүхдэд том хүний тунгийн 1/3 тунгаар вакцин тарих боломжтой гэж үзжээ"
Түүнчлэн “Манай улс олон улсын судалгааг маш анхааралтай ажиглаж байгаа бөгөөд 12-17 насны хүүхдүүдээ Рfizer вакцинаар дархлаажуулсан. Хүүхдүүдийн вакцинд хамрагдалт 90-ээс дээш хувьтай байгаа. Мөн вакцинд хамрагдсан насны хүүхдийн өвчлөл харьцангуй бага байгаа нь вакцин үр дүнгээ үзүүлж буйг харуулж байна.АНУ-ын Хүнс, эмийн агентлагаас 5-11 насны хүүхдэд том хүний тунгийн 1/3 тунгаар вакцин тарьж болох боломжтой гэж үзсэн. Гэхдээ дараагийн шийдвэрээ гаргахаар хүлээж байгааг бид анхааралтай ажиглаж буй" хэмээн хэллээ.
Эх сурвалж: www.polit.mn