Б.БЯМБАЖАРГАЛ
Улсын Ерөнхий прокурорын газрын Шүүхэд төрийг төлөөлөх хэлтэс Засгийн газрын хэрэгжүүлэгч агентлаг ЖДҮГ-тай хамтран ажиллахаар боллоо. Тухайлбал, Засгийн газрын тусгай сангаас зээл авсан зарим иргэн, аж ахуйн нэгжийн зөрчилтэй зээлийн асуудлыг шуурхай шалгаж шийдвэрлүүлэх, гэрээг хүчингүй болгох, хөрөнгийг санд буцаан төвлөрүүлж, төрийг алдагдалгүй болгох чиглэлээр хамтран ажиллахаар болсон байна.
ЖДҮ-ийг хөгжүүлэх сан нь жижиг, дунд үйлдвэр, үйлчилгээ эрхлэгчдэд дэмжлэг үзүүлж, үйл ажиллагааг нь өргөжүүлэх, ажлын байр бий болгох, тэдний үйл ажиллагааны менежментийн чадавхыг сайжруулах, зах зээлд өрсөлдөх чадварыг дээшлүүлэх урт хугацаатай, хөнгөлөлттэй зээл олгодог Засгийн газрын тусгай сан. Энэ хүрээнд тусгай сангаас жижиг дунд үйлдвэрлэл, үйлчилгээ эрхлэгч хувь хүн, хуулийн этгээдэд зохих журмын дагуу зээлүүдийг олгосон боловч зээлийн гэрээний зөрчилтэй, эргэн төлөлт хангалтгүйн улмаас зөрчилтэй олон тохиолдол гарч байгаа аж. Иймд УЕПГ, ЖДҮГ хамтран ажиллахаар болсон байна.
Уулзалтад Улсын Ерөнхий прокурорын орлогч, төрийн хууль цаазын шадар зөвлөх М.Чинбат, Улсын Ерөнхий прокурорын туслах прокурор, Шүүхэд төрийг төлөөлөх хэлтсийн дарга Д.Булганцэцэг, ЖДҮГ-ын дарга Я.Эрдэнэсайхан болон холбогдох хүмүүс оролцжээ.