Ш.ЖАВЗАНПАГМА 

Коронавирусын тахлаас үүдэн дэлхий нийтээр хоёр жил гаруй цахимаар боловсрол олголоо. Тэгвэл зайны сургалт ямар давуу болон сул тал авчирсан талаар Япон, Солонгос, Хятад, Ирландад суралцаж буй оюутнуудтай холбогдож саналыг нь сонслоо. 

Солонгос улсад суралцаж байгаа Г.Саруул:Лекцээ давтаж үзэх боломж олгосон 

-Хөл хорионоос үүдэн хичээл цахим хэлбэрээр явагдаж эхэлсэн нь сургалтын үр дүн талаасаа мөн техникийн хувьд туршилт хичээл ордог сурагчдын хувьд ур чадварт нь сөргөөр нөлөөлсөн. Цахимаар хичээллэснээр багаар хамтран ажиллахгүйгээс шалтгаалан  амьд харилцаа хязгаарлагдмал болсон ч нэг удаагийн лекцтэй харьцуулахад олон давтаж үзэх боломжтой. Хэрэгцээний олон аппликейшн зөв ашигладаг болох гэх мэт давуу тал ихтэй. Цар тахлын үед  өдрийн турш ихэнх цагаа гэртээ өнгөрүүлэх болсноор  гадаад хэлээ судлах, ном унших, идэвхитэй дасгал хөдөлгөөн хийх гэх мэтээр өөрийгөө хөгжүүлэх зүйлд цагаа зарцуулдаг болсон. Ингэсэнээр зорилгоо ухамсарлан суралцаж,  хувийн хариуцлага сайтай байх хэрэгтэй санагдсан. 

Ирландад суралцдаг Н.Хэрлэн:Идэвхи, анхаарлаа төвлөрүүлэх нь  буурсан

-Алсын зайнаас хичээллэснээр идэвхи, анхаарлаа төвлөрүүлэх нь  буурсан. Мөн амьд харилцаа үүсээгүйгээс шалтгаалан багш оюутныг мэдрэх түүнд нийцүүлэн сургах арга болон  багшаас асуулт асууж, харилцан ярилцах санал бодлоо солилцох боломж хязгаарлагдмал байсан. Цахимаар хичээллэхээр даалгавар бага өгдөг ганц, хоёр дасгал ч юмуу хийх байдлаар идэвхигүй болж эхэлдэг. Гэсэн зайнаас суралцсанаар бие даах, өөрийгөө хөгжүүлэх илүү  их цагтай болж байгаа. Энэ цагаараа цахим эвентэд оролцох, сургалтанд суух гэх мэтчилэн ашигтай үр өгөөжтэй өнгөрүүлэх боломж олгосон.  

Солонгос улсад суралцдаг М.Мандах: Даалгавар хийхдээ  номын сан орох боломж байгаагүй

- Цар тахалын оргил үед  цахим хэлбэрээр  хичээллэж эхлэхэд хэлний бэлтгэлтэй байсан болохоор 09:00-14:00 цаг хүртэл  хичээллэсэн.  Гэрийн даалгавараа хийхдээ  номын сан орох боломжгүй болохоор интернэтээс болон өөрт байгаа номоо ашигласан. Гэхдээ цахимаар хичээллэхийн давуу тал нь  хаанаас ч хичээлээ үзчих боломжтой санхүүгийн хувьд ч хэмнэлттэй. Харин сурлагын хувьд танхимаар хичээлээ үзэх нь илүү үр дүнтэй санагдсан. Одоогоор танхимаар хичээллэж мөн цар тахалын хүрээ багасаж нөхцөл байдал дээрдэж байна. 

Япон улсад суралцдаг оюутан Н.Энхнасан: Сэтгэлзүйгээ удирдахын тулд шинжлэх ухааны үндэслэлтэй зөвлөмж их уншсан 

-Хөл хорионы үед цахимаар хичээллэх хүндрэлтэй байсан. Багш нартай харилцах харилцаа хязгаарлагдмал болж, хичээлийн ахиц,  дэвшлийн хувьд танхимын хичээлтэй харьцуулахад үзсэн хичээлүүдээс сурсан мэдсэн зүйлийн үлдэц бага. Мөн цахимаар суралцахад ном сурах бичиг  хомсдолтой байсан. Хөл хорионд орж  гадаад орчноос тусгаарлагдахаас өмнө хийж  дадсан зүйлс өөрчлөгдсөн тул стресс нэмэгдсэн болохоор сэтгэлзүйгээ зөв удирдаж тайван байх үүднээс шинжлэх ухааны үндэслэлтэй зөвлөмжүүд болон ном уншиж эхэлсэн. Харин хичээл танхимаар орж эхэлснээр цагаа зохицуулж ажил хийх боломжтой болж байна.

Хятад улсад суралцдаг Ө.Эрхэмбилэг: Академик болон судлах чадвараа нэмэгдүүлсэн

-Хичээл цахимд шилжсэнээр академик болон судлах чадвараа нэмэгдүүлсэн. Сошиал сүлжээн дэх хязгааргүй олон мэдээллүүдээс үнэн зөвийг ялгах, мэдээлэл дундаас өөрт хэрэгтэйг нь сонгох чадварт суралцлаа. Үүнээс гадна бие дааж  суралцах чадвар олж авсан. Харин цахимаар суралцахын бэрхшээл нь гэртээ хичээлээ хийхэд  анхаарал өөр зүйлсэд их төвлөрдөг. Хичээлдээ төвлөрөхийн тулд тухайн хичээлээ сонсонгоо тэмдэглэж авах нь үр дүнтэй юм билээ.

Эх сурвалж: "Зууны мэдээ" сонин 2021.10.20 ЛХАГВА № 206 (6683)