Б.БЯМБАЖАРГАЛ

Гэр хорооллын дахин төлөвлөлтөд хамрагдахаар газраа чөлөөлж өгсөн иргэд одоог хүртэл байртай болж чадаагүй, орон гэргүй болсон талаараа хэвлэлийн хурал хийлээ. Хуралд Баянзүрх дүүргийн 4, 12 дугаар хороо, Сонгинохайрхан дүүргийн тавдугаар хорооны иргэд оролцов. Үүссэн нөхцөл байдлын талаар БЗД-ийн IV хорооны иргэн Г.Эрдэнэбилэг “Гэр хорооллын дахин төлөвлөлтөд орж 2014 оны зургадугаар сарын 4-нд газраа чөлөөлж “Их өргөө” компанитай гэрээ хийсэн.  Гэвч одоог хүртэл байр баригдаагүй, орох оронгүй болсон учраас гэр бүлээрээ айлаас айлд амьдарч байна. Миний мэдэж байгаачлан 184 айлыг хохироосон гэсэн мэдээлэл байна. Долоон жилийн хугацаанд айлуудын чөлөөлсөн газарт нэг ч байшин, барилга баригдаагүй. Тухайлбал, Э.Бат-Үүл нь өөрийн хүү Б.Чулуудайтай нийлэн олон айлыг орон сууцтай болгоно гэж газрыг нь чөлөөлүүлж хохироосон. Тэдний нэг нь манай гэр бүл. Гэвч Э.Бат-үүл нь СХД-ийн УИХ-ын нөхөн сонгуульд нэр дэвшээд явж байна. Би СХД-ийн сонгогчдод энэ талаар хэлнэ. Хэрэв хохирол барагдуулахгүй бол эсэргүүцлээ илэрхийлнэ. Долоон жилийн хугацаанд шүүх, цагдаа, холбогдох байгууллагуудаар явсан ч үр дүнд хүрээгүй” гэв.
Мөн хэвлэлийн хуралд оролцогч БЗД-ийн XII хорооны иргэн н.Отгонбаяр "Би ахыгаа төлөөлж ирсэн. 2013 оны наймдугаар сарын 23-нд “Grandline” компанитай гэрээ хийж газраа чөлөөлж өгсөн. Тухайлбал, найман жилийн өмнө тухайн компанид газраа эзэмшүүлэхээр өгсөн ч барилгын сууриас өөр зүйл хийгдээгүй байна. Гэрээ хийсэн “Грандлайн” компанийн захирал нь Б.Чулуудай гэж хүн байдаг. Хотын дарга асан Э.Бат-Үүлийн хүү. Тэгэхээр Э.Бат-Үүл нь ард түмнийг байртай болгож дахин төлөвлөлт хийх нэрийдлээр айлуудын газрыг хүүгийнхээ компанид өгсөн. Өнгөрсөн жил гуравдугаар шатны шүүхээр энэ хэрэг орсон байгаа. Шүүх хурлаар “Грандлайн” компани нь иргэдийг хохироосон нь үнэн болохыг тогтоосон. Хэзээ байранд орох нь тодорхойгүй байхад миний ах харваж бие нь муудсан. Хуулийн байгууллагын дүгнэлт гарчихаад байхад энэ компани хэзээ хариуцлага хүлээж хохирсон хүмүүсийг орон гэртэй болгох тал дээр хариулт авмаар байна. Энэ хороонд 48 өрх орох оронгүй болсон. Э.Бат-Үүлийн нэр дэвшиж буй СХД-ийнхэн өөрийг нь үнсэж угтдаг гэсэн байсан. Тэгвэл одоо үнсэж биш өндгөөр угтъя гэж хэлмээр байна” гэлээ.
Түүнчлэн СХД-ийн V хорооны “Э.Бат-Үүл өөрийн хүү Б.Чулуудайтай нийлж 800 орчим айлын газрыг чөлөөлж дахин төлөвлөлтөд оруулна гэсэн ч 184 айл одоог хүртэл орон гэргүй байна. Нэг айлын цаана үр хүүхэд, гэр бүлийн олон гишүүд бий. Гэвч эдгээр хохирсон иргэдийг доромжилж байгаа мэт Сонгинохайрхан дүүрэгт нэр дэвшиж байна. Энэ асуудлыг шийдсэн хойно нэр дэвших хэрэгтэй. Бид 184 хохирсон өрхийн төлөө өлсгөлөн зарлана” гэв. “Гранд лайн” компани ард иргэдийг залилсан гэсэн шийдвэр шүүхээс гарсан ч хариуцлага хүлээгээгүй, хэрэв асуудлыг шийдвэрлэхгүй бол эсэргүүцлийн хүнд хэлбэрт шилжинэ гэдгийг хохирсон иргэдийн төлөөлөл хэлж байлаа. 

Эх сурвалж: "Зууны мэдээ" сонин 2021.9.30 ПҮРЭВ № 192 (6669)