Б.ДАМДИН-ОЧИР

Газар нутгаа лицензээр хашуулчихаад, эзэмших, ашиглах эрхээ олж авахаар Говьсүмбэр аймгийн Шивээговь сумынхан таван жил тэмцэж байна. Уг лицензийг анх авсан “Шинэ шивээ”, шилжүүлж аваад одоо эзэмшдэг “Эйкүсора” компанид “...Газар нутгийг маань лицензээсээ гаргаж өгөөч” гэж хандаад нэмэр болоогүй. “Эйкүсора” компанид байгаль орчинд нөлөөлөх байдлын нарийвчилсан үнэлгээ гаргахад тус болж, төрийн тамга ашиглаж, хуурамч бичиг баримт үйлдсэн байж болзошгүй Шивээговь сумын II багийн ИНХ-ын даргын үүргийг түр орлон гүйцэтгэж байсан тус сумын иргэнийг АТГ-т шалгуулахаар өгсөн ч сураг алдарсан. 
Гэсэн ч Шивээговь сумынхан гар хумхиж суугаагүй байна. Шивээговь сумын ИТХ-аас 2019 оны эхээр Ерөнхий сайд, УУХҮ-ийн сайд, АМГТГ-ын дарга нарт ханджээ.
Тэд Ерөнхий сайд, УУХҮ-ийн сайдад 2019 оны нэгдүгээр сарын 4-нд Ашигт малтмалын лицензийг цуцлуулах тухай, АМГТГ-ын даргад 2019 оны хоёрдугаар сарын 14-ний өдөр Хүсэлт гаргах тухай албан тоотуудыг илгээжээ.
Эдгээр хүсэлтүүддээ зовлонгоо тоочиж тус сумын иргэд, аж ахуйн нэгж байгууллагад шинээр газар олгохтой холбоотой газар зохион байгуулалтын төлөвлөгөөнд тусгуулах саналтай газрууд нь ашиглалтын лицензтэй талбайд бүхэлдээ хамрагдсаныг тайлбарлажээ. Улмаар 3494 оршин суугчтай Шивээговь сумын нутаг дэвсгэр нь бүхэлдээ лицензийн талбайд хамаарч байгаа нь Монгол Улсын Үндсэн хууль, Газрын тухай хууль, Ашигт малтмалын тухай хууль болон холбогдох бусад хуулиудыг зөрчсөнөөс гадна иргэдийн Үндсэн хуулиар олгогдсон үндсэн эрхийг ноцтойгоор зөрчсөн үйлдэл болоод байгааг ч хэлсэн байгаа юм. Мөн хэрвээ иргэдийн өмчлөлийн газрыг ашиглалтын лицензээс гаргаж, чөлөөлөхгүй бол сум орон нутгийн удирдлагын зүгээс холбогдох шатны шүүхэд хандахаа ч мэдэгджээ. 
Харин энэ асуудлыг гардан хариуцдаг АМГТГ-аас хариуг нь өгөхдөө “...Геологи, уул уурхайн асуудал эрхэлсэн төрийн захиргааны байгууллага нь танайхаас ирүүлсэн албан бичгийг үндэслэн лицензийг цуцлах үндэслэл болохгүй үүгээр мэдэгдье” гэжээ. Өөрөөр хэлбэл, АМГТГ нь Шивээговь сумын иргэдийн Үндсэн хуулиар олгогдсон эрх зөрчигдөөд байгаа нь лицензийг цуцлах үндэслэл болохгүй гэж хэлчихжээ. 
Ингэж “Эйкүсора” эзэмшиж буй лиценздээ Шивээговь сумын газар нутгаас гадна стратегийн ордыг бүхэлд нь, төмөр замын хамгаалалтын зурвасыг хэсэгчлээд багтаачихсан. Энэ нь цаасан дээр тус компанийг эзэмшдэг Хонгконгийн компанийн мэдэлд байх боловч Монголын нэг зартай нөхөр, нэмэгдээд олны танил, нэр хүндтэй нөхдүүд мэддэг болчихсон байгаа юм.
Үргэлжлэл бий...

Эх сурвалж: "Зууны мэдээ" сонин 2021.9.24  БААСАН  № 188 (6665)