Д.ДАРАМБАЗАР

Хөлбөмбөгийн холбоо, Унгарын элчин сайдын яамтай цаашид хамтын ажиллагаагаа үргэлжлүүлж, өргөжүүлэхээр болжээ. Холбооноос “Урт хугацааны стратеги хөтөлбөр”-ийн хүрээнд нэгдүгээр зорилтот тусгагдсан “Мэргэжлийн хөлбөмбөг”, гуравдугаар зорилтод буюу “Мэргэжлийн болон мэргэшсэн боловсон хүчин” бэлтгэх зорилгоор Унгарын Элчин сайдын яамтай уулзалт хийлээ. Тус уулзалтад МХБХ-ны Ерөнхий нарийн бичгийн дарга Д.Тэрбаатар, Техникийн захирал Б.Буман-Учрал нар оролцсон. Энэ уулзалтаар 2015 оноос хойш хэрэгжиж байгаа Пушкаш академийн хамтын ажиллагааг өргөжүүлэх талаар ярилцсан. Жилд солилцдог тамирчны тоог нэмэгдүүлэх, эмэгтэй тамирчин солилцоог оруулах, дасгалжуулагч солилцоог эхлүүлэх, академийн салбарыг эх орондоо байгуулах мөн тамирчдын ур чадварыг нэмэгдүүлэх үүднээс "teqball"-ийн спортыг хөгжүүлэх асуудлыг тусгав. Тус улсын яам МХБХ-ноос тавьсан саналуудыг судалж, хамтын ажиллагаагаа өргөжүүлэх боломжтой гэдгээ илэрхийлжээ.

Эх сурвалж: www.polit.mn