Т.САЙХАН

ЦЕГ-аас сүүлийн үед гарсан байгаа гэмт хэргүүдийн талаар мэдээлэл өглөө.    ЦЕГ-ын Хэвлэл, мэдээллийн төвийн дарга,дэд хурандаа Б.Баатархүү “Өчигдөр 17.30 цагт Баянзүрх дүүргийн наймдугаар хорооны зочид буудлын ариун цэврийн өрөөнд хүн нас барсан гэсэн дуудлага мэдээлэл цагдаагийн байгууллагад ирсэн. 30-32 насны М, Б нар боомилсон байдалтай амь насаа алдсан нөхцөл байдал тогтоогдож байна. Тэд гэр бүл байсан.   Урьдчилсан байдлаар камерын бичлэгийг шалгасан. Гаднаас ямар нэгэн хөдөлгөөн байхгүй, архидан согтуураагүй болох нь тогтоогдсон. Амь хохирогчдын үхлийн шалтгааныг задлан шинжилгээгээр эцсийн байдлаар тодорхой болгоно. Мөрдөн шалгах ажиллагаа үргэлжилж байна.

Гэрээслэлийн асуудал яригдаж байгаа. Өр, зээлийн асуудал ч яригдаж байгаа ч одоо тодорхой болсон зүйл алга. Энэ бүхэн мөрдөн шалгах ажиллагааны явцад тогтоогдоно. Үүний дараа мэдээлэл өгөх хэрэгтэй байх. Нөгөө талаар амиа хорлосон мэдээллийг хэтэрхий дэвэргэх нь бусдад сэдэл төрүүлэх сөрөг үр дагавартай. Гурван хүүхдийг нь асран хамгаалагч нарт нь хүлээлгэн өгсөн байгаа гэв.

Түүнчлэн Нарны хороололд 27 настай иргэн өндрөөс унаж нас барсан гэсэн дүгнэлттэй байна. Гэхдээ шүүхийн шинжилгээний эцсийн дүгнэлт гаргаагүй байна. Согтуурсан, мансуурсан, эрүүл байсан эсэх нь шүүх шинжилгээний дүгнэлтээр тодорхой болно. Урьдчилсан байдлаар сэтгэл гутралтай байсан гэсэн зүйлүүд яригдаж байгаа. Гэхдээ үүнийг өндрөөс унаж амь насаа алдсан шалтгаан гэж үзэж болохгүй. Хэргийг шалгаж байх явцад тухайн иргэн амиа хорлох ямар шалтгаан байв гэдгийг нарийн шалгадаг учраас мөн л урьдчилсан дүгнэлт өгч болохгүй.

-Өчигдөр Баян-Өлгий цагдаагийн газарт “манай хүүхэд нас барчихлаа” гэсэн дуудлага мэдээлэл ирсэн. 30 настай эрэгтэйг 26 настай иргэн архидан согтуурсан үедээ биед нь халдаж, амь насанд нь хүрсэн хэрэг гарсан байна. Үүнийг Баян-Өлгий цагдаагийн газар шалгаж байна.

Эх сурвалж:www.polit.mn