Ч.Зотол   

Олимп, тив, дэлхийн аваргын тэмцээнд Монголын тамирчид амжилттай оролцсон жилүүдэд спортын төрөлжсөн сургалттай их, дээд болон дунд сургуулиуд элсэгч олонтой байдаг. Энэ хөдөлгөөн  хамгийн оргил үедээ хүрсэн нь 2008 оны Бээжингийн олимпоос  боксын төрөлд Э.Бадар-Ууган алт, П.Сэрдамба мөнгө, жүдо бөхийн төрөлд Н.Түвшинбаяр алтан медаль, буудлагын төрөлд О.Гүндэгмаа мөнгөн медаль  хүртэж, Спортын төв ордон зөв боксын төрөлд л гэхэд суралцах хүсэлтэй  100 гаруй хүүхдийг бүртгэж авч байв. Мөн тэр үеэс буудлага, жүдогийн спортыг сонирхох хүүхэд залуусын тоо эрс нэмэгдэж, БСШУЯ-ны харъяанд Төрөлжсөн сургалттай биеийн тамир, спортын дунд сургуулийг  нээсэн юм. 

Энэ удаа  Токиогийн олимпийн наадмын хүндийн өргөлтийн  эмэгтэйчүүдийн төрөлд Монгол Улсын гавьяат тамирчин, Азийн аварга шалгаруулах тэмцээний хүрэл медальт, ОУХМ М.Анхцэцэг  шагналт дөрөвдүгээр байр эзэлсэн нь өсвөр үеийнхний дунд  энэ спортыг сонирхон хичээллэх  том давалгааг эхлүүлээд байна. Үүнтэй уялдуулан Төрөлжсөн сургалттай Биеийн тамир, спортын дунд сургууль хүндийн өргөлтийн шинэ ангийг нээжээ. Ингэснээр тус  спортоор хичээллэх сонирхолтой өсвөр үеийнхэн IV, VI, VIII ангиас элсэн суралцах боломж  нээгдсэн байна. Тус сургууль мөн дээрх ангиудад бокс, таеквондо, дугуй, өнгөн атлетикт  сонирхолтой  хүүхдүүдийг сургадаг.  Энэ хичээлийн  жилийн элсэлтийн бүртгэл өчигдрөөс эхэлсэн бөгөөд энэ сарын  24-нд дуусч, элсэлтийн шалгалтыг 25-ны 10.00 цагт авахаар товложээ. Ингэхдээ олон улсын болон улсын аварга шалгаруулах тэмцээнд медальт байр болон шагналт байр эзэлсэн тамирчин-сурагчдыг сонгон шалгаруулж авна хэмээн  мэдэгджээ.  

Дэлгэрэнгүй мэдээллийг Спортын төв ордны 305 тоот, 11324294, 99726666 дугаарын утсанд холбогдон авч болох юм байна. 

Эх сурвалж: www.polit.mn