Т.САЙХАН

ИНЕГ-ын дарга Л.Бямбасүрэн БНСУ-ын Сөүл хотод жил бүр болдог “Агаарын харилцааны хэлэлцээр” хийх үеэр Улаанбаатар Сөүл чиглэлд “Изинис Эйрвэйз” ХХК-ийг нууцаар нэмэхээр ажиллаж байгаа гэх мэдээлэл гараад байсан. Тэгвэл уг хэлэлцээрийг хуулийн хүрээнд болсон эсэхийг АТГ-аас шалгаж эхэллээ.  Улмаар шалгалтын хүрээнд АТГ-аас ЗТХЯ, ИНЕГ-т энэ сарын 5-ны өдөр нэгжлэг хийж, “Агаарын харилцааны хэлэлцээр”-тэй холбоотой бичиг баримтууд болон хэлэлцээрт явсан бүрэлдэхүүн, тушаал шийдвэрийг шалгасан байна. Мөн зарим компьютер,техник хэрэгслийг нь хураан авчээ.  Үүнийг дагаад хууль бус олон асуудалд нэр холбогддог ИНЕГ-ын дарга Л.Бямбасүрэн “банга” хүртэх нь тодорхой болсон тухай яриа гарч эхлэв.

ИНЕГ-ын дарга Л.Бямбасүрэн тэргүүтэй удирдлагуудын хууль зөрчсөн байж болзошгүй, албан тушаалын байдлаа ашиглаж хувийн эрх ашгаа гүйцэлдүүлсэн шинжтэй олон асуудал яригддаг нь үнэн.  Мөн шүүхийн шатанд Л.Бямбасүрэн нарт хамаарах 4-6 хэрэг хянагдаж, зарим хэргүүдэд тэднийг яллагдагчаар татсан тухай эх сурвалжийн мэдээлэл бий.

Түүнчлэн Ерөнхий сайд Л.Оюун-Эрдэнэ өнгөрсөн дөрөвдүгээр сард л ИНЕГ-ын дарга Л.Бямбасүрэнд хариуцлага тооцохыг Зам, тээврийн хөгжлийн сайд Л.Халтарт анхааруулж байсан. Тэрбээр,"Засгийн газрын шийдвэрийг эсэргүүцдэг төрийн албан хаагч гэж байж болохгүй. Тэр ИНЕГ-ын дарга Л.Бямбасүрэнд анхааруул. Том толгойлсон нөхдөд хариуцлага тооцох хэрэгтэй. Л.Халтар сайд шаардлагатай бол ажлаас нь чөлөөл. Их олон юм сонсогдоод байгаа шүү" хэмээн ажлаас нь чөлөөлөх үүрэг өгч байв.

Эх сурвалж:www.polit.mn