М.ОЮУНТҮЛХҮҮР

Хүүхэд багачууд төдийгүй гэр бүлийн гишүүдийн зорин очиж үйлчлүүлдэг газруудын нэг бол парк. “Үндэсний соёл амралтын хүрээлэн” үйл ажиллагаагаа хэвийн явуулж эхлээд 14 хонож байна. Тиймээс тус газарт зорин очих залуус болон үйл ажиллагаа хэрхэн явагдаж байгаа талаар сурвалжиллаа.

Паркын үйл ажиллагаа ямар горимоор явагдаж байгааг “Үндэсний соёл амралтын хүрээлэн” ХХК-ны газрын захирал М. Нүрмаагаас тодрууллаа.

-Танай байгууллага хэдээс хэдэн цагийн хооронд үйл ажиллагаагаа явуулж байгаа вэ?

-Манайх өдөр бүр өглөө 10.00 цагаас орой 22.00 цаг хүртэл ажиллаж байна. Мөн зургаагаас доош насны хүүхдүүдэд үйлчлэхгүй байгаа.

-Үйлчлүүлэгчдэд халдвар хамгааллын дэглэмийг хэрхэн мөрдүүлж байна?

-Өнгөрсөн жил Эрүүл мэндийн яамнаас журам гаргасан байгаа. Үүнээс гадна “Хариуцлагын гэрээ”г хийсэн байгаа. Үүний дагуу ажиллаж байна. үйлчлүүлэгчдийг ирэх үед халуун хэмжих, QR код уншуулах, хүн хоорондын зайг баримтлах, тоглоомыг ариутгах зэрэг ажлуудыг тогтмол хийж байна.

-Хэдэн тоглоом нь хэвийн ажиллаж байгаа вэ?

-Зургаагаас доош насны хүүхдэд үйлчлэхгүй байгаатай холбоотойгоор бага насны хүүхдүүдийн тоглоомууд ажиллахгүй байгаа. Хэвийн ажиллаж  байгаа 15 тоглоом байгаа. Жишээ нь, галзуу хулгана, алсыг харагч, гинж, динозавр гэх мэтчилэн тоглоомууд байна.

-Төрсөн өдрийн урамшуулал байгаа юу?

-Төрсөн өдрийн урамшуулал байгаа. Тухайн өдөр төрсний гэрчилгээ эсвэл иргэний үнэмлэхээ авчран урамшууллаа эдлэх боломжтой. Үүнд нас хамаарахгүй. Мөн хоёрдугаар тунд хамрагдсан байхыг шаардаж байгаа.

-“Боулингийн төв”ийн үйл ажиллагаа явагдаж байгаа юу?

-Ажиллаж байгаа. “Боулингийн төв” маань дотроо биллиард, теннис, боулинг, хоолны газартай. Мөн зуны турш паркын тоглоомоор үйлчлүүлсэн тасалбараа үзүүлээд боулинг 50 хувь хөнгөлөлттэй тоглох боломжтой.  

-Цагийн хуваарь, халдвар хамгааллын дэглэмтэй холбоотой асуудлууд үүсч байна уу?

-Залуус ихэвчлэн 21.00 цагт ирдэг. Бид 22.00 цагтаа хаахын тулд 21.00 цагт кассаа хаадаг, үүнд залуучууд болон олон нийт тийм ч таатай биш байдаг. Парк бол хүүхдүүд бага насныхан хамгийн их тоглодог газар шүү дээ. Гэтэл тэд нар маань үйлчлүүлж чадахгүй байгаа нь их бухимдуулж байх шиг байна” хэмээсэн юм.

Халдвар хамгааллын дэглэмийг мөрдөхтэй холбоотойгоор тоглоомуудын дүүргэлт 50 хувь байх ёстой. Ингэснээр бөөгнөрөл, дараалал ихээр үүсэх эрсдэл нэмэгдэж байна.

Эх сурвалж:www.polit.mn