Ч.ЗОТОЛ

 Засгийн газрын шийдвэрийн дагуу ТОСК /Төрийн орон сууцны корпораци/-тай гэрээ байгуулан амьдарч ирсэн  Хангай хотхоны 221, Буянт-Ухаа-II  хотхоны 600 гаруй өрх Төрийн ордны гадаа ес дэх өдрөө тайван суулт хийж байна. Тэд Ерөнхий сайдтай бичелэн уулзаж, шаардлагынхаа хариуг авна хэмээн мэдэгдсэн юм.  Учир нь  Засгийн газраас зорилтот бүлгийн иргэдийг орон сууцаар хангах хөтөлбөрийн хэрэгжилтийг хангаж, иргэдтэй анх байгуулсан бичгийн болон аман гэрээ, хэлцлээ биелүүл  гэсэн утга бүхий албан бичгийг тэд гүйцэтгэх засаглалын тэргүүнд хаяглан хүргүүлэхдээ энэ сарын 5-нд хариуг өгөхийг шаардсан.

Шаардлагад:

-  Засгийн газрын 2016 оны тавдугаар сарын 31-ний өдрийн 298 дугаар тогтоолоор баталсан түрээсийн орон сууцны нэг метр, квадратын үнийг 1 880 000/нэг сая найман зуун ная/ төгрөгөөр тогтоосон шийдвэрийг цуцлах,

- Түрээслэгчдийн ТОСК-тай байгуулсан 2017 онд хийсэн “Орон сууц түрээслэх гэрээгээр” тохиролцсон үнэ буюу нэг метр, квадратыг 1 280 000/нэг сая хоёр зуун ная/ төгрөгөөр тооцож өмчлөх,

-Түрээслэгчийн тухайн өдөр хүртэл төлсөн төлбөрийг түрээслээд өмчлөх холбогдох журмын жишигт нийцүүлэн орон сууцны үнэд тооцож, өмчлөх асуудлыг шийдвэрлэх  гэсэн гурван асуудлыг тавьсан байна.

 Түрээслэгчид  энэ хооронд Төв талбайд мэдэгдэл хийж, ТОСК, БХБЯ, Их тэнгэрийн ам, Төрийн ордны үүдэнд тайван жагсаал хийсэн. Тодорхой хариу өгөхгүй бол цаашид ч тэмцлээ үргэлжлүүлнэ гэлээ.

Эх сурвалж: www.polit.mn