Ч.ЗОТОЛ

“Зууны мэдээ” сонин Монгол Улсын гавьяат тамирчин Э.Цэндбаатарын багш, Баянгол спорт хорооны боксын  дасгалжуулагч, ОУХМ Б.Энхтайваныг “Ярилцах цаг”-ийн зочноор урьж ярилцсан юм. Түүний хэлсэн онцлох эшлэлүүдийг хүргэж байна.

-Оросын тамирчинтай учраа таарсныг хараад  “Цэндээ бол Оросын тамирчныг ялна, харин ялалтаа луйвардуулчих вий гэж айж байсан. Гэтэл яг тийм зүйл боллоо”.

-Сая Цэндээ маань эхний  хоёр үе хожсон. Гуравдугаар раундад битүү хамгаалаад, эсвэл зайнаас тоглох ёстой байсан. Үүн  дээр  авч явсан дасгалжуулагчдын алдаа гарсан.  Монголын боксын холбоо алдаа гаргасан.

-Хоёр дахь тоглолтынх нь орой А.Гантулга дасгалжуулагчийг Б.Чинзоригийн хамт буцаачихсан юм билээ. Багшгүй тамирчин үлдэнэ гэдгийг би ойлгохгүй байгаа.

-Шигшээ багийн ахлах дасгалжуулагч Ж.Энхтөрийн хувьд  сүүлийн 20 жил Монголын боксоос  хол байсан хүн.

- Сүүлийн үед хэдэн залуус Монголын боксын холбоог авчихлаа. Залуу хүн авч байгаа нь болж байна. Гэхдээ ахмадуудаа сонсохоо байчихаж.

-Монголын боксын шигшээ багт боксын спортод ид хүчээ сорьж байгаа тамирчдынхаа  хэнийг нь ч танихгүй, мэдэхгүй залуучуудыг оруулаад ирсэн.  

-Тоолуулахаар цохилт аваагүй байхад тоолж байгаа нь “но”-той. Харж байгаа хүмүүст үзэмж алдуулах гэсэн муу арга хэрэглэв үү   гэж бодогдсон.

-Оросын тамирчин бол маш муу ажиллагаатай байсан.  60 кг-аас жин хассан юм билээ, гэхдээ л тоглолтын хувьд маш муу байсан, сэргэлтийн хувьд ч тэр.

- 1988 онд Цэрэндоржийн Амаржаргал рингэн дээр  ялалтаа авсан ч   маргааш нь ялалтыг нь буцаачихсан тохиолдол гарсан. Тэр бол олимпод гарсан маш том луйвар.  

- Оросууд манайхныг луйвардаад бүр сурчихсан. 1997 онд   Т.Үйтүмэн ОХУ-ын тамирчинтай тоглоод ялсан атал ялалтаа  луйвардуулчихсан. 2005 онд Э.Бадар-Ууган Оросын тамирчинтай, 2015 онд  Г.Ган-Эрдэнэ мөн ОХУ-ын тамирчинтай  таараад ийм юм болсон.

- Ази тивийн  хошой аварга  Х.Алтанхуяг багш  над руу яриад  “Харамсалтай юм болж байна” гээд  уйлж байна лээ, би ч уйллаа. Тийм ялалт авчихаад ялалтаа алдана гэдэг харамсалтай шүү дээ.

--Цэндээгийн хувьд 57, 60 кг-д тоглоход өөрөө бол  нуруугаар тийм ч өндөр биш. Тэгсэн хэрнээ тэр хүүхдийн сэтгэл зүрх асар өндөр.

-Ирэх  10-11 дүгээр  сард  Дэлхийн аварга шалгаруулах тэмцээн Сербид болно. Гэхдээ жин бол 60 кг-д байгаа.

-Би амьд сэрүүн телевиз хараад сууж байхад Монголын боксын холбооны  зарим түшмэл   “Цэндбаатарын багш бол  О.Батхүү” гээд ярьж  байна лээ.

- Монголын боксынхон хоорондоо асуудлаа ярьдаггүй нь  алдаа. Хэдэн хүн хоорондоо яриад шийдчихдэг.

- Өнөөдөр Монголын боксдод дутагдаж байгаа зүйл бол дасгалжуулагчдын зөвлөл гэж алга. Түүнийг нарийн бичиг  нь шийддэг буруу тогтолцоотой болсон.

Эх сурвалж: www.polit.mn