Б.ДОЛЖИНЖАВ

ХХААХҮ-ийн сайд З.Мэндсайхан энэ намраас эхлэн хүнсний улаанбуудайг Хөдөө аж ахуйн биржээр дамжуулан арилжих болсноо мэдэгдсэн. Энэ хүрээнд тариалан эрхлэгчид, гурилын үйлдвэрийн удирдлагуудтай уулзаж санал солилцон, нэгдсэн ойлголтод хүрэх, итгэмжлэгдсэн агуулахуудыг бэлтгэх, тус агуулахад ажиллах хүний нөөцийг сургах зэрэг бэлтгэл ажлыг базааж байна.

 Өнөөдрийн байдлаар 13 аймгийн 200 орчим тариаланчтай цахимаар болон биечлэн уулзалт зохион байгуулж, тэдний  саналыг сонсоод байна. Тухайлбал, энэ сарын 1-нд  Сэлэнгэ аймгийн Зүүнбүрэн суманд хүнсний улаанбуудайг биржээр арилжихад оролцох бүх талын төлөөлөл цуглаж, хэлэлцүүлэг өрнүүлж, анхны туршилтын арилжааг зохион байгууллаа. 

Уулзалтын үеэр ХААБ-ээс улаанбуудайг хэрхэн арилжих тухай танилцуулж, блокчейн технологид суурилсан анхны жишиг арилжааг зохион байгуулж, оролцогч талуудад дэлгэрэнгүй мэдээлэл өглөө.  Тус уулзалт нь арилжаанд оролцогч талуудын саналыг сонсож, нэгдсэн ойлголтод хүрч, биржийн арилжааг зөв зохион байгуулалттайгаар амжилттай эхлүүлэхэд чиглүүлэх зорилготой байсан юм.  Тариаланчдын зүгээс, төр засгийн бодлого шийдвэрийг дагаж, хамтран ажиллана гэдгээ илэрхийлээд энэ жилээс эхлэн биржээр улаанбуудайг арилжих нь цаг хугацааны хувьд тохиромжтой эсэх, улаанбуудайн чанарыг баталгаажуулах субъект нь хэн байх, брокерууд ямар үүрэг оролцоотойгоор тариаланчийн өмнөөс ажиллах, ямар стандартаар арилжаа хийх, худалдан авагч тал нь зөвхөн гурилын үйлдвэрүүд байх эсэх, бирж зөвхөн дотоодын арилжаа бус экспортын чиглэлд хэрхэн ажиллах зэрэг асуултыг асууж байлаа.

Энэ үеэр ХХААХҮ-ийн яамны Бодлого, төлөвлөлтийн газрын дарга Ц.Болорчулуун

 “Төрийн зүгээс биржээр улаанбуудайг борлуулах ажлын бэлтгэлийг хангасан. Тус ажлыг эхлүүлэх цаг нь болсон учир хугацаа алдалгүй энэ намраас арилжааг үе шаттайгаар эхлүүлэх нь зүйтэй. Анх удаа хүнсний буудайг биржээр арилжих гэж байгаа учир алдаа дутагдалтай зүйл гарахыг үгүйсгэхгүй. Гэхдээ алсдаа улаанбуудайн үнэ цэнийг нэмэгдүүлж, экспортод гаргахад биржийн арилжаа зайлшгүй чухал” гэдгийг онцоллоо. Харин “Улаанбаатар гурил” компанийн салбарын захирал Ц.Оюунсүрэн биржээр дамжуулан арилжаа хийснээр чанарын баталгаатай түүхий эд худалдан авах давуу тал бий болохыг хэлж байсан юм.

Тус үйл ажиллагаанд ХХААХҮ-ийн яамны Төрийн нарийн бичгийн дарга Т.Жамбалцэрэн, Бодлого, төлөвлөлтийн газрын дарга Ц.Болорчулуун, Газар тариалангийн бодлогын хэрэгжилтийг зохицуулах газрын дарга В.Үнэнбат, Хөдөө аж ахуйн бирж /ХААБ/ ХХК-ийн гүйцэтгэх захирал Ж.Осоржамаа болон холбогдох удирдлага, албан хаагчид, Хөдөө аж ахуйг дэмжих сан /ХААДС/-ийн гүйцэтгэх захирал О.Сумъяасүрэн, тариалан эрхлэгчид, гурилын үйлдвэрийн удирдлагууд, дундын зуучлагч брокерууд оролцсон юм.

 Эх сурвалж:www.polit.mn