Б.Дэмбэрэлням

“Токио-2020” олимпийн наадамд хүндийн өргөлтийн төрөл дөрөвдүгээр байр эзэлсэн гавьяат тамирчин М.Анхцэцэг олимпод оролцсон сэтгэгдлээ хуваалцлаа.

-Намайг төрсөн цагаас , анх эх барьсан эмчээс авхуулаад цэцэрлэг сургуулийн найз гудманд зөрөөд өнгөрсөн хүн бүхэн өнөөдрийн Анхцэцэгийг бүтээсэн гэж би боддог. Төрүүлж өсгөсөн аав ээждээ , үргэлж дэмждэг гэр бүл , багшдаа маш их баярлалаа.  Сүүлийн долоон жил  хамт байж намайг өөрийн хүүхэд шиг хайрладаг Ц.Хосбаяр багш , Т.Самбуу багш болог үе үеийн хүндийн өргөлтийн тамирчдынхаа хүслийг гүйцээж,  2024 онд олимпийн аварга болохоо амлаж байна. “Токио-2020” олимпод оролцохдоо нялх биетэй байгаагүй , манай хүүхэд ирэх 10 сард гурван нас хүрнэ.Олимпийн эрх олгох сүүлийн цуврал тэмцээн эхлэх гэж байсан учраас анхныхаа тэмцээнд амаржаад дөрвөн сартай нялх биетэй байхдаа оролцсон гэдгийг залруулъя. Миний хамгийн хямарсан үе бол олимпийн оноо цуглуулах цуврал тэмцээний сүүлийн дөрөв таван сар байлаа. Оноо цуглуулах эхний тэмцээнүүддээ нялх биетэй хөхүүл хүүхэдтэй байсан учраас хангалттай сайн оролцож чадаагүй.Энэ нь нийт оноонд сөргөөр нөлөөлж олимпийн эрх авах эсэх нь эргэлзээтэй болсон.Тухайн үед хүмүүс юу гэж хэлэх бол гэж санаа зовж хямарч бухимдаж байсан. Монгол Улсыг дэлхийд таниулахаар, улсаа төлөөлж ирсэн 43 тамирчин  маш их хөдөлмөрлөж зовж шаналсны энэ эрхийг олж авсан. Засгийн газар , Олимпийн хороо БТСГ зэрэг аль нэг албан байгууллагаас энэ тамирчинг явуулья гэж шийдвэрлэдэггүй .Тамирчид өөрийн үнэнч хүч хөдөлмөрөөр тив дэлхийд амжилт гаргаж олимпийн эрхийг эх орондоо авчирдаг.Тийм учраас бүгдээрээ эерэг хандлагатай байцгаая.Надад медаль авахаас илүү үзэгчид түмний дэмжлэг ,урмын үг  урам зориг ,хүч өгдөг.Токиогийн олимп өмнөх Олимпоос илүү тамирчдаас  харуцлага шаардаж байлаа.Би өвдвөл бусад тамирчид маань өвдөж 43 хүн олимпийг орхих  учраас “ус уухдаа” ч өөрийгөө хянаж байлаа. “Токио-2020” олимпод оролцох тамирчдад тэтгэлэг олгож дэмжиж байсан олимпийн хороонд баярлалаа. Монголын ард түмэн бүхнийхээ дэмжлэгийн хариуг Парисийн тэнгэрт монголын далбааг мандуулж төрийн дууллаа эгшүүлэх болно гэлээ.

Эх сурвалж:www.polit.mn