Б.ОД

ОХУ-д шатахууны үнэ өссөнтэй холбоотойгоор тус улс тодорхой хугацаанд Монгол Улсад АИ-98, АИ-95 бензин нийлүүлэлтээ хязгаарлаж байгаагаа мэдэгдсэн. АМГТГ-ын мэдээлж байгаагаар манай улс шатахууны 30 хоногийн нөөцтэй байна.Тиймээс шатахууны нөөцийг хэвийн хэмжээнд барихаар БНХАУ-тай хэлэлцээр хийж байгаа талаар АМГТГ өнгөрсөн долоо хоногт мэдээлсэн. 

Тэгвэл тус улсын “China oil” компанитай хэлэлцээр хийснээр  эхний ээлжийн шатахуунаа авахад бэлэн болсон талаар Уул уурхай хүнд үйлдвэрийн сайд Г.Ёндон өнөөдөр мэдээлэл хийлээ.Тэрбээр "Эдийн засгийн нөхцөл байдалтай уялдуулж, үе шаттайгаар АИ-80,АИ-92 зэрэг шатахууны ханшийг чөлөөт зах зээл рүү шилжүүлэх нь зүйтэй. Өдөр бүр валютын ханшийн өсөлт бууралтыг мэдээлж байдаг шиг нээлттэй, үнийг чөлөөтэй зарлах зах зээлийн зохицуулалт үгүйлэгдэж байна" гэв.

Монгол Улс газрын тос боловсруулах үйлдвэрийн төслийг хэрэгжүүлж байгаа. Тус үйлдвэр 1.5 сая тонн нефть боловсруулах хүчин чадалтай бөгөөд жилд дотоодын хэрэглээний 55 хувийг хангана хэмээн Засгийн газраас мэдээлсэн юм.                                          

 Эх сурвалж:www.polit.mn