Ч.ЗОТОЛ
“Токио-2020” зуны олимпын XXXII наадмын боксын тэмцээний эрэгттэйчүүдийн 57 кг-ийн жинд Монгол Улсын гавьяат тамирчин Э.Цэндбаатар эхний тулаанаа хийж ялснаар боксын тамирчдынхаа ялалтын салхийг хагалсан юм. Түүний өрсөлдөгч Кенийн ахмад боксчин 38 настай Окот Николас Оконго улсынхаа нэг номерийн боксчин, Кенийн шигшээ багийн тамирчин, Африкийн аварга, Африкийн наадмын хүрэл медальт, Бээжингийн олимпын наадамд оролцож байсан туршлагатай тамирчин байв. Э.Цэндбаатарын сэтгэгдлийг хүргэе.
-Токиогийн олимпийн рингэнд эхний тулаанаа хийсэн сэтгэгдлээ хуваалцана уу?
-Эхний тулаан хүнд боллоо. Хүссэнээрээ тоглож чадаагүй. Багш нар маань хамгаалалтаа сайн хийж тайван тоглоорой гэсэн. Гэвч бие тавирч өгөхгүй зуураад байсан, гэхдээ өрсөлдөгчөө ялж чадлаа. Ойрын үед 57 кг-д тоглоогүй, жин хасалгүй удсан нь нөлөөлж байх шиг байна. Дараа дараагийн тоглолтод сайн тоглохыг хичээнэ.
-Өрсөлдөгч өөрөөс чинь ахмад тамирчин, гэхдээ Бээжингийн олимпод оролцож байсан хашир туршлагатай боксчин гэсэн. Тоглоход хүнд байв уу?
-Тоглоход хүнд байлаа. Олимпод орон орны шилдэг тамирчид ирсэн. Тийм болохоор өрсөлдөгчид хэзээ ч муу байхгүй шүү дээ. Ямартай ч Кенийн нэг номерийн тамирчныг ялсандаа баяртай байна.
-Үзэгчгүй танхимд тоглох ямар санагдав?
-Тамирчин хүний хувьд хөгжөөн дэмжигчдийн уухайг мэдэрч тоглох л хамгийн сайхан санагддаг. Энэ удаа олимпийн заал чимээ аниргүй байгаа нь нэг бодлын амар юм шиг атлаа дүнсийгээд нэг тиймхэн байна.
-Дараагийн учраа Вьетнамын бас л нэг номерийн тамирчин байх. Тоглолтыг нь хэр мэдэх вэ?
-Ерөнхийдөө тоглолтыг нь мэдэж байгаа. Хичээж тоглоно гэж бодож байна.
-Энэ мөчид монголчууддаа хандаж юу хэлэх вэ?
-Олимпод оролцож байгаа баг тамирчдаа дэмжиж, урам зориг өгөөрэй. Цар тахлын үед та бүхнийгээ үзэх, харах зүйлтэй байлгаж, Токиогийн тэнгэр дор бүгд эрч хүч, авхаалж самбаагаа сорьж байгаа. Бүгд төрийн дууллаа эгшиглүүлэхийн төлөө хичээж байна. Эвтэй байж цар тахлыг давна шүү гэж хэлье. Эргээд 28-нд баяртай уулзацгаая, түр баяртай.
Эх сурвалж. www.polit.mn