Ч.Олдох 

Монголын боксчдоос  өнөөдөр Монгол Улсын гавьяат тамирчин, ДАШТ-ий хүрэл медальт, Азийн наадмын аварга /2018/, Ази тивийн 2021 оны аварга Э.Цэндбаатар 57 кг-ын жинд эхний тулаанаа Кениулсын тамирчин Окоч Николас Оконго-той хийж  3:2 оноогоор  ялалт байгууллаа. 

Э.Цэндбаатарын хувьд ямар ч тамирчинтай таарсан рингэн дээр гараад яаж тоглохоо өөрөө шийдчихдэг. Багш, дасгалжуулагчдын тактикийг бүтээлчээр хэрэгжүүлдэг авьяаслаг боксчин гэлцдэг.  

Тэрээр гурав хоногийн дараа буюу даваа гаригт дараагийн тулаанаа Вьетнамын тамирчинтай хийнэ.  

Боксын тамирчдаас дэлхийн  армийн аварга, Ази тивийн 2021 оны аварга, ҮШБ, “Алдар” спорт хорооны тамирчин ОУХМ Б.Чинзориг 63 кг-ын жинд эхний тулаанаа маргааш хийнэ. Эмэгтэйчүүдийн 75 кг-ын жинд ҮШБ,  Уулын баяжуулах “Эрдэнэт” үйлдвэрийн “Хангарьд” спорт хорооны тамирчин, ОУХМ М.Мягмаржаргал дөрөв хоногийн дараа буюу энэ сарын 28-н эхний тулаанаа  хийнэ. 

“Токио-2020” олимпын наадмын боксын төрөлд хүч, хурд, авхаалж самбаа, оюун ухаан, уг чадвараа сорин өрсөлдөхөөр эрэгтэйчүүдийн найман жинд 187 тамирчин, эмэгтэйчүүдийн таван жинд 102 тамирчин нийт 13 жинд 289 тамирчин өнөөдрөөс эхлэн ирэх сарын 8-ны өдөр хүртэл нийт 276 тулаан хийж Зуны XXXII олимпын наадмын  алт, мөнгө, хүрэл медальтнуудаа шалгаруулах юм. 

Эх сурвалж. Polit.mn