Б.ДЭМБЭРЭЛНЯМ

Дэлхийн шатрын холбооноос энэ сарын 10-ны өдрөөс ирэх сарын 8-ны өдрийн хооронд ОХУ-ын Сочи хотноо “Дэлхийн цом- 2021”, “Эмэгтэйчүүдийн Дэлхийн цом -2021” өндөр зэрэглэлийн тэмцээнүүдийг зохион байгуулж байна.

Хоёр жилд нэг удаа зохион байгуулагддаг “Дэлхийн цом-2021”-д 206 тамирчин “Эмэгтэйчүүдийн Дэлхийн цом- 2021”-д 103-н шилдэг шатарчин дэлхийн өнцөг булан бүрээс чуулж байгаа юм.

Дэлхийн шатрын холбооноос дэлхийн шилдэг 39 орны шатрын холбоодод эрэгтэй, эмэгтэй тус бүр нэг шатарчин нэр дэвшүүлэх эрхийн дагуу Монголын шатрын холбооноос зургадугаар сарын 4-6-ны өдрүүдэд сонгон шалгаруулах тэмцээнийг зохион байгуулж эрэгтэй ангилалд Их мастер Д.Батсүрэн, эмэгтэй ангилалд ОУМ Т.Мөнхзул үндэсний ялагчаар шалгарч эх орноо төлөөлөн оролцох эрх, Ази тивийн аварга шалгаруулах хайбрид тэмцээнээс ОУМ С.Ган-Эрдэнэ 8-р байрт шалгарсан амжилтаараа дэлхийн хэмжээний тэмцээнд оролцох эрхээ  авсан бол 2019 оны Ази тивийн 3.3 бүсийн аварга шалгаруулах тэмцээний дэд аварга, Их мастер Б.Мөнгөнтуулын хувьд түүний амжилтуудыг үндэслэн ДШХ-ны eрөнхийлөгчийн цагаан хуудaс урилгаар оролцуулах болсон.

Зөвхөн өндөр зэрэглэлийн шатарчид оролцдог дэлхийн хэмжээний томоохон тэмцээнд Монгол Улсаа төлөөлөн дөрвөн шилдэг шатарчин оролцож байгаа нь Монголын шатрын түүхэнд том амжилт юм.

 Тэмцээн хасагдах системээр найман даваа буюу бүрэн матч, тус даваа бүрт цагаан, хар талаас тус бүр үндсэн стандарт 1 өрөг тоглож, оноо тэнцсэн тохиолдолд рапид, блиц төрлүүдээр мөн адил цагаан, хар талаас тус бүр 1 өрөг тоглон хайнаагаа хагалж явсаар аваргуудаа тодруулах юм.

Энэ жилийн  Дэлхийн цом тэмцээний дэргэд “Анхдугаар Эмэгтэйчүүдийн Дэлхийн цом- 2021”-ийг зохион байгуулж, хувцаслалтын өндөр дэг журам мөрдөж буйгаараа өнгөрөгч цомуудаас онцлогтой.Ингэснээр тэмцээнд оролцогчдын тоог нэмэгдүүлэн хамрах хүрээгээ тэлж,  шагналыг санг хувиар өсгөсөн байна.

Энэ оны долдугаар 12-ны өдрөөс эхлэн Улаанбаатарын цагаар 20:00 цагт эрэгтэй, эмэгтэй ангиллууд зэрэг эхний давааны үндсэн стандарт өргүүдээ тоглож эхэлсэн юм. “Дэлхийн цом- 2021”-ийн гадаад чангаасаар эхний 50, Эмэгтэйчүүдийн “Дэлхийн цом -2021”-ийн гадаад чансаагаар эхний 25-д жагсаж буй шилдэг шатарчид эхний даваанд тоглохгүйгээр өнжиж байгаа бөгөөд хоёрдугаар  даваанаас эхлэн хүч үзнэ. Тэмцээний шагналын сангийн хувьд эхний давааг давахад л $3750 үнийн дүнг халааслах бөгөөд даваа давах бүрт $6000, $10,000, $16,000 гэсэн үнийн дүн үргэлжилсээр эрэгтэй ангиллын ялагч $110,000, эмэгтэй ангиллын ялагч $50,000 үнийн дүнг халааслан гэртээ харих юм.

Эх сурвалж: www.polit.mn