Т.САЙХАН

Төв аймгийн Сэргэлэн сумын Хөшигийн хөндийд баригдсан шинэ нисэх буудлын нээлт,  анхны нислэгийн үйл ажиллагаа өчигдөр болж, Ерөнхийлөгч У.Хүрэлсүх оролцож, нээлтийн үг хэллээ.  Шинэ нисэх буудлын анхны нислэгийг үндэсний агаарын тээвэрлэгч “МИАТ” ТӨХК-ийн OM501 аяллын дугаартай, “Boeing 737-800” агаарын хөлөг Японы Токио, Нарита чиглэлд амжилттай гүйцэтгэв.

Анхны нислэгийн ёслолын эхэнд нисэх буудлын зорчигчийн танхим дахь Монгол-Япон Найрамдлын дурсгалын цогцолборын хөшөөг Монгол Улсын Ерөнхийлөгч У.Хүрэлсүх, Япон Улсаас Монгол Улсад суугаа Онц бөгөөд Бүрэн эрхт Элчин сайд Кобаяши Хироюки нар албан ёсоор нээв. Мөн нээлтийн  ёслолд Зам, тээврийн хөгжлийн сайд Л.Халтар, Гадаад харилцааны сайд Б.Батцэцэг, Ерөнхийлөгчийн зөвлөх Э.Одбаяр, Б.Даваадалай, Ерөнхийлөгчийн Тамгын газрын дэд дарга А.Үйлстөгөлдөр,  “Нью Улаанбаатар Интернэйшнл Эйрпорт” ХХК-ийн Гүйцэтгэх захирал Като Такэо нар хүрэлцэн ирсэн байв.

У.Хүрэлсүх: Монголын ард түмэнд хөгжлийн шинэ үүд хаалга нээгдэж байна

Энэ үеэр Ерөнхийлөгч У.Хүрэлсүх ““Өөдлөх айл үүднээсээ” гэж ардын сайхан үг бий. Шинэ нисэх буудал Монголын ард түмний үүд хаалга, манай улсын хөгжил цэцэглэлтийн бэлгэ тэмдэг болж шинээр нээгдэж байгаад чин сэтгэлээсээ баяртай байна. Одоогоос гурван жилийн өмнө буюу 2018 онд миний бие Япон Улсын Ерөнхий сайдын урилгаар тус улсад албан ёсны айлчлал хийх үеэр хоёр орны харилцаа, хамтын ажиллагаа, Стратегийн түншлэлийн чиглэлээр олон асуудал яригдсаны дотор хамгийн ихээр онцгойлон ярьсан нэг асуудал нь энэ нисэх буудлын барилгыг барьж, ашиглалтад оруулах байсан.  Энэ талаар хоёр орны Ерөнхий сайд нар санал бодлоо солилцож, хамтарч ажиллахаар болсон юм. Түүнээс хойш шинэ нисэх буудлын төслийн олон ажил эрч хүчтэй явагдан, өнгөрсөн жил бид нар шинэ нисэх буудлаа хүлээн авсан. Цар тахлын харгайгаар энэ ажил тодорхой хугацаанд хойшлогдсон ч өнөөдөр албан ёсоор Монгол Улсаас Япон Улсын Токио хотын чиглэлд анхны нислэгээ үйлдэх түүхэн үйл явдал болж байна” гэдгийг онцоллоо.

Япон Улсын Ерөнхий сайд Сүга Ёшихидэ мэндчилгээ ирүүлжээ

Япон Улсаас Монгол Улсад суугаа Онц бөгөөд Бүрэн эрхт Элчин сайд Кобаяши Хироюки энэ үеэр “Монгол Улсын агаарын үүд хаалга болох энэхүү шинэ нисэх буудлын үйл ажиллагаагаар дамжуулан Монгол Улсын иргэд болон дэлхийн өнцөг булан бүрээс ирэх бүх зочид, үйлчлүүлэгчид сэтгэл ханамжтайгаар үйлчлүүлдэг нисэх буудал байлгахын төлөө ажиллах тул цаашид дэмжин ажиллахыг та бүхнээс хүсэж байна” гэлээ. Мөн тэрбээр шинэ нисэх онгоцны буудлын нээлтэд зориулан Япон Улсын Ерөнхий сайд Сүга Ёшихидэ мэндчилгээ ирүүлснийг уншиж сонордуулав. “Чингис хаан” олон улсын нисэх буудлын менежментийг ирэх 15 жилд хариуцан ажиллах “Нью Улаанбаатар Интернэйшнл Эйрпорт” хариуцан ажиллах юм байна.

“Буянт-Ухаа” нисэх буудлыг сургалтын зориулалтаар ашиглана

Ийнхүү шинэ нисэх буудал ашиглалтад орсноор хуучин “Буянт-Ухаа” нисэх буудлыг ерөнхий зориулалтын агаарын тээврийг хөгжүүлэх болон сургалтын зориулалтаар ашиглаж, Хөшигийн хөндийд баригдсан “Чингис хаан” олон улсын нисэх буудлаар дамжуулан гадаад болон дотоодын арилжааны бүх нислэгүүдийг үйлдэх юм. “Чингис хаан” олон улсын шинэ нисэх буудлаас агаарын тээврийн Mongolian Airlines /MIAT/, Aero Mongolia, Hunnu Air, Eznis Airways LLC, Air China Limited, Aeroflot, Turkish Airlines, Korean Air, Asiana Airlines Inc., Air Busan, SCAT Airlines зэрэг компаниуд нислэг үйлдэнэ.

Жилд гурван сая зорчигч хүлээн авна

Монгол Улс, Япон Улсын Засгийн газраас хамтран хэрэгжүүлсэн томоохон төслүүдийн нэг болох “Чингис хаан” олон улсын шинэ нисэх буудлын бүтээн байгуулалтаар,

•Жилд гурван сая зорчигч хүлээн авах хүчин чадал бүхий зорчигч үйлчилгээний барилга

•24 агаарын хөлөг зогсох перрон талбай

•43 метр өндөр нислэгийн хөдөлгөөний барилга

•8000 тонны багтаамж бүхий шатахууны агуулах

•Жилд 11900 тонн карго ачаа шуудан нэвтрүүлэх хүчин чадал бүхий карго терминал,

•Олон улсын C9 зэрэглэлтэй Аврах гал унтраах барилга

•Бие даасан дулааны станц болон цахилгаан шугам сүлжээний дэд барилгууд

•Хоногт 800 шоо метр цэвэр болон бохир ус цэвэрлэх, ариутгах, татуурга ус цэвэршүүлэх байгууламж зэрэг үндсэн 30 гаруй барилга, байгууламжаас бүрдсэн, олон улсын стандартад нийцсэн шинэ нисэх буудал баригдсан юм.

Эх сурвалж: “Зууны мэдээ” сонин

2021.7.5 ДАВАА № 133, 134 (6610, 6611)