С.САРУУЛ

КОВИД 19 халдвар авсан нь батлагдсан иргэн эмнэлэгт очсон ч тусламж авч чадалгүй гадна нь нас барсан харамсалтай хэрэг өчигдөр гарсан. НЭМГ-ын дарга Б.Бямбадорж “Мэдээллийн эхэнд талийгаачийн ар гэрт эмгэнэл илэрхийлж байна. Талийгаач долдугаар сарын 2-нд Хатагтай эмнэлгийн Онош мед лабораторид түргэвчилсэн тест өгсөн. Ингээд шалгаж үзэхэд эерэг хариу гарсан. Мөн уушигны рентгэн зураг авхуулсан. Рентген зургаас харахад хатгаатай байсан. Талийгаач нь Чингэлтэй дүүргийн дугаар хорооны 50 дугаар байранд ажиллангаа амьдардаг хүн байж. Үндсэн захиргаа нь Баянзүрх дүүргийн 28 дугаар хороо. Чингэлтэй дүүргийн 50 дугаар байр нь 6 дугаар хорооны өрхийн эмнэлгээс 10 метрийн зайтай байрладаг. Өөрөөр хэлбэл, өрхийн эрүүл мэндийн төв ойрхон байсан. Тус хорооны хэсгийн ахлагчийн өрхийн эмнэлгийн эмчид өгсөн мэдээллээр тус тоотод хоёр хүн алт мөнгөний дархан хийж амьдардаг. Амьдардаг өрөөнийх нь орчин тааруу, орон сууцны зоорийн давхарт байрладаг. Сүүлийн 10 хоногт согтууруулах ундаа байнга хэрэглэж байсан гэдэг өгүүлэмж өгсөн байна.Тухайн иргэн долдугаар сарын 2‑ны 09:30 цагт 103 дуудаж, үзүүлсэн. Дуудлагаар эмч очиход орчны харилцаа хэвийн, өөрийн биеийн байдлаар танилцуулж байсан. 103-ын эмч рентген зургийг нь үзээл уушигны хатгаа байна, харъяалын өрхийн эмнэлэгт ханд гэдэг зөвлөгөө өгсөн. Талийгаач Баянзүрх дүүргийн Энрэл эмнэлэгт хандсан. Тус эмнэлэг нь зургадугаар сарын 4-нөөс КОВИД-ын эмнэлэг болж ажиллаж байгаа. Өглөө 103-ын эмч үзээд харьяа эмнэлэгтээ хандахыг зөвлөсөн юм байна гээд Энэрэл эмнэлэгт хэвтэх хүмүүсийн нэрсийн жагсаалтыг шалгаж үзэхэд тухайн иргэний нэр байгаагүй. Ингээд тухайн иргэнийг Баянзүрх дүүргийн нэгдсэн эмнэлэг рүү явуулсан. Гэвч дүүргийн эмнэлэг буцаагаад Энэрэл эмнэлэг рүү явуулснаар гадна нь очсон. Яг тухайн үед ХӨСҮТ-рүү хүнд өвчтөнөө хүргэж өгөөд буцаж ирсэн машин таарсан. Эмнэлгийн машины жолооч дахин 103 дуудсан боловч таван минутын дотор түргэн тусламж ирэхэд нас барсан байсан" гэв.

“Энэрэл” эмнэлгийн гадна иргэн нас барсан асуудалд хариуцлагагүй хандаж, яаралтай тусламж үзүүлэх арга хэмжээг шуурхай удирдлагаар хангаж ажиллаагүй зарим албан тушаалтнуудыг чөлөөлөхөөр боллоо. Тодруулбал, НЭМГ-ийн эмнэлгийн тусламжийн хэлтсийн дарга М.Мөнхдэлгэр, “Энэрэл” эмнэлгийн дарга Амартүвшин, яаралтай тусламжийн 103 төвийн дарга Пүрэвдаш нарыг ажлаас нь чөлөөлөх арга хэмжээ авахаар боллоо. Мөн яаралтай тусламж үзүүлээгүй Баянзүрх дүүргийн нэгдсэн эмнэлгийн удирдлагад арга  хэмжээ авах, гэрээг цуцлах хүртэл хариуцлага тооцохоор зохих газруудад үүрэг болгожээ.

Эх сурвалж: www.polit.mn