Б.ДОЛЖИН
Хүн амын 70 хувийг вакцинд хамруулснаар сүргийн дархлаа тогтоно. Ингэхдээ хүүхдүүдийг вакцинд хамруулж байж энэ хувьд хүрнэ гэдгийг ЭМЯ-ны Эмнэлгийн тусламжийн бодлого, хэрэгжилтийг зохицуулах газрын дарга Б.Буянтогтох хэллээ.
Тэрбээр "Тархвар судлалаас үзвэл, хүн амын 70 орчим хувь нь дархлаа тогтсон үед нийтийн дархлаа тогтох шалгуурыг хангадаг.Өөрөөр хэлбэл, 10 хүн тутмын долоо нь дархлаажуулалтад ямар нэг байдлаар хамрагдаж байж тохиолдлын тоо эрс буурдаг.Өнөөдрийн байдлаар манай улс 18-аас дээш насны иргэдээ дархлаажуулахаар төлөвлөсөн. Энэ нь нийт хүн амын 60 хувь гэсэн үг. Харин нийт хүн амын 70 хувийг дархлаажуулах ёстой гэвэл бид зайлшгүй хүүхдүүдийг вакцинд хамруулах шаардлагатай болж байна.Тодруулбал, одоогоор манай улсад 0-17 насны 1185991 хүүхэд бий. Үүнээс 12-17 насны хүүхдүүдийг вакцинд хамруулж байж хүн амын 70 хувьд хүрнэ.Хэрэв шаардлагатай бол 290068 хүүхдэд Pfizer вакциныг хийх боломжтой.Pfizer вакциныг 12-15 насны хүүхдэд хийхийг АНУ, ХБНГУ, Канад болон Европын холбооны улсууд зөвшөөрсөн. Харин Pfizer-аас бусад вакцины хувьд одоогоор хараахан судалгаа хийгээгүй эсвэл судалгааны үр дүн нь гараагүй байна.Монгол Улс 16-17 насны хүүхдүүдийг эцэг, эхийнх нь зөвшөөрлөөр вакцинд хамруулах тооцоо, судалгааг хийж байна.Ер цаашид нийт хүн амын 70 хувийг дархлаажуулах шаардлагатай болвол 8-15 насны хүүхдүүдийг ч вакцинжуулахаас өөр аргагүй” гэж ярилаа.
Эх сурвалж:www.polit.mn