Б.ДОЛЖИНЖАВ

 Засгийн газрын өнөөдрийн хуралдаанаар Хүүхдийн мөнгөн тэтгэмж олгохтой холбоотой журамд нэмэлт өөрчлөлт орууллаа. Тодруулбал,хүүхдийн мөнгөн тэтгэмжийг тухайн хүүхэд, асран хамгаалагч өрх, иргэн авч чадахгүй байх, хүүхдийн эсрэг хүчирхийлэл үйлддэг асран хамгаалагч мөнгийг зохисгүй хэрэглэдэг бол мөнгийг хүүхдийн нэр дээрх дансанд нь шилжүүлнэ. Ингэхдээ хүүхдийн байгууллагын дүгнэлтийг үндэслэх юм. 

Нийт хүүхдийн 97 хувь нь хүүхдийн мөнгийг захиран зарцуулах эрхтэй хүнтэй хамт амьдардаг. Харин 2.9 хувь буюу 22 орчим мянган хүүхэд тусдаа амьдардаг. Тэдний 900 орчим нь албан бус гэр бүл салалтаас болж мөнгөө өөртөө болон тухайн амьдарч байгаа өрхийн хэрэглээнд зарцуулж чаддаггүй судалгаа гарчээ. Мөн нийт өрхийн 0.2 хувь буюу 1120 өрх хүүхдийн мөнгөний ихэнх хувийг архи, согтууруулах ундаанд зарцуулдаг байна. Хүүхдийн мөнгөн тэтгэмжний 86 хувийг ээж, 11 хувийг аав, 3.5 хувийг асран хамгаалагч, ердөө 0.3 хувийг 16 нас хүрсэн хүүхэд өөрийн дансандаа холбуулжээ.

Эх сурвалж:www.polit.mn